नेपाल संघीय प्रणालीमा गएसँगै मुलुकमा दुईपटक निर्वाचन भइसकेको छ । दोस्रो पटकको स्थानीय तह निर्वाचन सम्पन्न भएको पनि एक बर्ष पूरा भएको छ । यसबीचमा के गर्दैछन् जनप्रतिनिधिहरु ? उनीहरूको काम–कारबाहीबाट जनताहरु कत्तिको सन्तुष्ट छन् ? लगायतका विषयमा नागरिक तहबाट प्रश्न उठ्ने गरेको छ । यसै सेरोफेरोमा सुनसरीको रामधुनी नगरपालिका वडा नम्बर १ को एकबर्षीय कार्यकालको समिक्षासहितको कुराकानी गरिएको छ । प्रस्तुत छ, हाम्रो शब्दकर्मी सुबिन विश्वकर्माले रामधुनी वडा नम्बर १ का वडा अध्यक्ष महेश कुमार चौधरीसँग गरेको कुराकानीको सम्पादित अंश :
अध्यक्षज्यू, तपाई निर्वाचन भएको पनि झण्डै डेड वर्ष हुनलाग्यो, यस बीचमा वडाले गरेका उपलब्धिहरू केके छन् नि ?
यहाँहरुलाई थाहै छ, म दोस्रोपटक रामधुनी १ को वडा अध्यक्ष पदमा निर्वाचित भएको हो । हामीले यस वर्ष शिक्षा र स्वास्थ्यलाई अलि बढी जोड दिएका छौँ । जस अन्तर्गत भासी स्कुललाई नर्सरीदेखि कक्षा ५ सम्म इङलिस मेडियममा कक्षा सुरु गरेका छौँ । स्थानीय स्रोतबाट ४ जना जनशक्ति राखेका छौँ । स्वास्थ्यको क्षेत्रमा भन्नुहुन्छ भने भासी स्वास्थ्य चौकीसँग समन्वय गरेर उपचारसहितको नियमित आँखा चेकजाँचको सुरु गरेको छौ । त्यस्तै, स्वास्थ्य चौकीमा ल्याबको व्यवस्थापन पनि गर्न लागेका छौ ।
दोस्रोपटक निर्वाचित भएर आउँदै गर्दा तपाइले देखेको यस वडामा सम्भावना र चुनौती केके छन् ?
यो वडा ठूलो र बजार क्षेत्र भएकाले सम्भावना र चुनौती दुबै छन् । गत निर्वाचनमा यस वडाबाट ५ जना नै नेपाली कांग्रेस बाट निर्वाचित भएका थियौँ र यसपालि पनि ५ जना नै कांग्रेसबाट छाँै, त्यसैले अलि सहज छ । अलि अगाडिसम्म बाटोघाटो झुम्का बजारसम्म आइपुग्नै समस्या थियो, तर अहिले हामीले यहाँका धेरैजसो बाटाहरु ग्राबेल, इन्टरलक र कालोपत्रे गरिसकेको अबस्थामा छ । अबको तीन बर्षमा यस वडामा रहेका प्रत्येक बाटाहरुलाई गाउँ–घरदेखि झुम्का बजारसम्म जोड्न इन्टरलक र कालोपत्रे गरेर स्तरीय बनाउने सोचमा छु ।
तपाईं आफैले चाहिँ यहाँका वडाबासी तपाईंसँग कत्तिको सन्तुष्ट भएको पाउनु भएको छ ?
पक्कै पनि, यहाँका वडाबासीको लागि मैले पहिलो कार्यकालमा ठिक काम नगरेको भए मलाई दोस्रोपटक फेरि जिताउनुहुन्न थियो होला । त्यसैले पनि सन्तुष्ट नै हुनुहुन्छ आजको दिनसम्म ।
नगरपालिकासँगको समन्वय तथा सहकार्य र अबको भावी योजनाहरु केके छन्, त्यो पनि बताइदिनुहोस् न ?
पहिलो कार्याकालमा नेपाली कांग्रेसका मेयर जयप्रकाश चौधरी हुनुहुन्थ्यो । त्यो बेला पनि नेपाली कांग्रेसले तीन ओटा वडा जितेका थियौ, अहिले पनि तीनवटा वडा जितेका छौ । पहिले सबै वडालाई समान व्यबहार हुन्थ्यो, मेयरबाट । प्रत्येक वडामा डेढदेखि २ करोडसम्म बजेट विनियोजन हुन्थ्यो । तर अहिले चुनौती छ । वडामा खुम्चिएर बजेट विनियोजन भइरहेको छ । बजेट कम भएकोले काम गर्न अलि असहज छ । यसबारे मैले पटकपटक कुरा राख्दै आएको पनि छु । मेयरले यसरी नै बजेट विनियोजन गर्दै जाने हो भने अबको पाँच वर्षसम्म पनि वडाको तर्फबाट केही गर्न सक्ने अबस्था रहन्न । सक्देनौँ पनि । पहिलो कार्यकालमा पर्याप्त बजेट हुँदा वडाले ३० लाखभन्दा बढीको गौरवका योजना सम्पन्न गर्नसक्ने हैसियत राख्थ्यो । तर अहिले आएर बजेट सिलिङ ७०/८० लाखमा खुम्चिदा काम गर्न सकिएको छैन । यदि यस्तै हो भने नगरले सोचे हुन्छ कि यो पाँच बर्ष खेर फाल्ने अबस्था रहनेछ ।
नगर र वडाको समन्वय भन्नुपर्दा मेयर र उपमेयरसँग कुनै वडा अध्यक्षको राम्रो छ भने टेबल मुनीबाट भएपनि पर्याप्त सिलिङ पाउँछ । जस्तो कि १ नम्बर वडा कांग्रेसले जितेको छ, मेयर र उपमेयर अर्कै दलबाट हुनुहुन्छ र हाम्रो वडालाई हेर्ने उहाँहरुको दृष्टिकोण फरक छ । म उदाहरण दिन चाहन्छु, हाम्रो वडाको झुम्का बजारमा प्रत्येक वर्ष २० देखि २५ लाखको हटिया ठेक्का लगाइन्छ । मैले बारम्बार भने, हटिया अव्यवस्थित छ, त्यो हिलोमय छ, त्यसलाई व्यबस्थित गरौँ तर नगरबाट अहिलेसम्म सुनुवाई भएको छैन । अर्को, हामीकहाँ खसीको मासु र ताजा मासु पाइने मिटमार्ट छ, जहाँबाट हामीलाई प्रत्येक महिना ३०/४० हजार आम्दानी भइरहेको छ । प्रत्येक दिन २०÷२५ ओटा खसी काट्दा हुने फोहोर व्यवस्थापन गर्न सकिरहेका छैनौं । नगरलाई जति भन्दा पनि सुनुवाई हुँदैन अनि वडामा बजेट छैन । त्यसैले तपाईंले भनेको भावी योजनावाला प्रश्नको स्पष्ट जवाफ पनि दिनसक्ने अबस्थामा छैनौं हामी ।
Discussion about this post