रामधुनी । सोमबार भएको रामधुनी नगरपालिकाको १६ औँ नगर सभा बिगतकोभन्दा फरक देखियो । नगरपालिकाको सभाहलमा भएको नगर सभाबाहिर ठुलै सुरक्षा चुनौती रहेको भान हुँनेगरि बाक्लो संख्यामा नेपाल प्रहरी तैनाथ थिए ।
बिहान करिब १० बजे नगर सभा सुरु भएपछि मेयर शंकरलाल चौधरीले नीति तथा कार्यक्रम प्रस्तुत गरेका थिए । नीति तथा कार्यक्रम प्रस्तुत गर्दासम्म हल शान्त थियो । मेयरले छलफलका लागि जब फ्लोर ओपन गरे, त्यसपछि वडा नं. १ का वडा अध्यक्ष महेश चौधरीले बोल्न खोजे, तर मेयर चौधरीले ‘तपाई आयोजक हो, तपाई बोल्ने हैन, तपाईले बोल्न पाउँनुहुन्न, सदस्यहरुलाई दिने हो’ भनेपछि माहोल झन तातियो । होहल्ला सुरु भयो । वडा नं. ९ का अध्यक्ष घनश्याम चौधरी, वडा नं. ६ का अध्यक्ष शिवशंकर राजधामी लगायतले अध्यक्ष महेशको समर्थन गरे भने नेकपा एमालेबाट निर्वाचित जनप्रतिनिधिहरु मेयर चौधरीको पक्षमा उभिए, महेशलाई बोल्न दिइएन ।
त्यहि बिचमा हलबाहिर तैनाथ रहेकामध्ये केहि नेपाल प्रहरी नगर सभा भएको ठाउँमा प्रवेश गरे । प्रहरी होहल्ला सुनेर छेउमा उभिए । होहल्लाबीच मेयर चौधरीले नीति–कार्यक्रम पास गरिदिन अनुरोध गरे, लगत्तै बहुमत नगर सभा सदस्यहरुले समर्थन गरेपछि मेयर चौधरी भने–नीति तथा कार्यक्रम पास भएको जानकारी गराइन्छ ।
त्यसपछि महेश, घनश्याम लगायत जनप्रतिनिधि ‘बोल्न नपाएको’ भन्दै कानुनी परामर्शमा बाहिर निस्किए । हलको माहोल शान्त भयो । त्यसपछि उपमेयर तारा थापाले बजेट प्रस्तुत गरिन ।
बजेटमाथिको छलफलका क्रममा रामधुनी १ का वडा सदस्य राम भरोस रौनियारले आफुहरुले बिरोध गर्छौँ भन्दा प्रहरी तैनाथ गरिएको भन्दै आपत्ति जनाए । उनले भने, ‘..हामी बिरोध गर्छौँ भन्दा प्रहरी तैनाथ राख्नुपर्ने आवश्यक थिएन । तर, शासन राजतन्त्रभन्दा पनि बढि भयो ।’
सभाको अन्तिममा बोल्न पाएका वडा अध्यक्ष महेशले पनि प्रहरी परिचालन गरिएकोमा आपत्ति जनाए । मेयरलाई कसैले गोली होने आफु उनको सुरक्षाका लागि गोली थाप्न तयार रहेको महेशको भनाई थियो । उनले पार्टीभन्दा माथि उठेर काम गर्नसमेत मेयरलाई आग्रह गरेका छन् ।
२०७४ सालदेखि वडा अध्यक्षको रुपमा निरन्तर आफुले १६ ओटा नगर सभामा भाग लिदै आएको भए पनि सभाभित्रै प्रहरी प्रवेश गरेको पहिलो घटना भएको वडा अध्यक्ष घनश्यामको भनाई छ ।
बजेट दिने कुरामा नेपाली कांग्रेस र नेकपा एकीकृत समाजवादीका वडा अध्यक्षहरुलाई उपेक्षा गरिएको भन्दै अध्यक्षहरु मेयरसँग असन्तुष्ट छन् । त्यस्तै, सूचना नदिएको भन्दै विभिन्न ६ राजनीतिक दल र झुम्का उद्योग वाणिज्य संघसमेत नगरपालिकाविरुद्ध आन्दोलनमै रहेकाले सुरक्षा चुनौती हुनसक्ने भएकाले प्रहरी बोलाइएको नगरपालिका स्रोतको दावी छ ।
