रामधुनी-५ मा आकर्षक झुम्का मिनी पार्क निर्माण, स्थानीयको घुमफिर र मनोरञ्जनका लागि नयाँ गन्तव्य

रामधुनी । रामधुनी नगरपालिका वडा नम्बर ५ मा अहिले ‘झुम्का मिनी पार्क’ निर्माण धमाधम भइरहेको छ । वडा अध्यक्ष भोला बास्तोलाको नेतृत्वमा यो पार्कलाई आधुनिक र व्यवस्थित बनाउने काम तीव्र गतिमा अघि बढेको छ ।

झुम्का बजारसँगैको नहरको डिलमा निर्माणाधीन पार्क अहिले गाउँघरका बालबालिका, युवा र वृद्धवृद्धाको घुमफिर र मनोरञ्जनको रोजाइ बन्दै गएको छ । पार्कलाई हरियाली र शान्त बनाउन ज्याकमान्डाका विरुवा रोपेर सजावट गरिएको छ ।

पार्कभित्र सर्वसुलभ फ्रि वाइफाईको व्यवस्था गरिएको छ भने आगन्तुकलाई विश्राम लिनका लागि फलैचा राखिएको छ । पैदल यात्रा गर्न पक्की इन्टरलक लगाइएको पार्कभित्र गौतम बुद्धको आकर्षक मूर्ति स्थापना गरिएको छ, जसले शान्ति र सद्भावको सन्देश दिने वडा नम्बर ५ का वडा सदस्य शौजन तामाङले बताए ।

झुम्का बजारसँगै नजिक यो पार्कले वडाबासीलाई हरियाली वातावरणमा घुमफिर गर्न सक्ने ठाउँ बनाउने लक्ष्य लिएको वडा अध्यक्ष बास्तोलाले बताए । बालबालिकादेखि वृद्धवृद्धा सबैका लागि रमाइलो हुने खालको सुविधा विस्तार गर्दै जाने उनको भनाई छ ।

निर्माण सम्पन्न भएपछि झुम्का बजार र आसपासका बासिन्दाका लागि यो मिनी पार्क भेटघाट, घुमफिर र सामाजिक गतिविधिका लागि लोकप्रिय गन्तव्य बन्ने अपेक्षा गरिएको वडा अध्यक्ष बास्तोलाले बताए । उनले भने, ‘बजारको नजिकै तर भीडभाडबाट केहि टाढा रहेको यो पार्क भेटघाट, घुमफिर र सामाजिक गतिविधिका लागि सबैको रोजाईको केन्द्र बन्नसक्छ । यसले झुम्का बजारको व्यवसायीक गतिबिधिमा पनि केहि मदत गर्नेछ ।’

(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)