स्थानीय उत्पादनमा जोड : हरेक वर्ष तीन हजारभन्दा बढी फलफूलका विरुवा वितरण गर्दै रामधुनी नगरपालिका

रामधुनी । आत्मनिर्भर स्थानीय उत्पादन र हरित वातावरणको लक्ष्यसहित रामधुनी नगरपालिकाले फलफूलका विरुवा वितरण कार्यक्रमलाई निरन्तरता दिँदै आएको छ । नगरपालिकाको कृषि विकास शाखामार्फत विगत दुई वर्षदेखि हरेक वर्ष करिब तीन हजारभन्दा बढी फलफूलका विरुवा वितरण हुँदै आएको छ ।

कृषि विकास शाखाका प्रमुख तुलसीराम चौधरीका अनुसार चालु आर्थिक वर्ष २०८१÷०८२ मा मात्रै तीन हजार वटा विभिन्न आँप र लिचिका विरुवा वितरण गरिएको छ । अघिल्लो आर्थिक वर्ष २०८०÷०८१ मासमेत करिब यति नै संख्यामा विरुवा वितरण भएको हो । उनले भने ‘नगरभित्रका कृषक र सर्वसाधारणलाई फलफूलका विरुवा वितरण गरेर आत्मनिर्भर उत्पादन र वातावरण संरक्षणमा टेवा दिन खोजिएको हो । आगामी बर्षसमेत यो कार्यक्रमले निरन्तरता पाउँनेछ ।’

नगर प्रमुख शंकरलाल चौधरीले स्थानीय उत्पादनमै आत्मनिर्भर बन्दै किसानको आयआर्जन बढाउने र नगरलाई हरियाली बनाउन विरुवा वितरण कार्यक्रमलाई निरन्तरता दिएको बताए । आगामी दिनमा यो अभियानलाई अझ विस्तार गरिने उनको भनाई छ । उनले भने, ‘हामीले स्थानीय उत्पादनमै आत्मनिर्भर बन्न खोजेका हौं । किसानको आय बढोस्, नगर हरियाली होस् भनेर यो विरुवा वितरण थालेका हौं । यो काम अझै बढाउने सोच छ ।’

कृषि शाखाका अनुसार आगामी वर्षहरूमा अझ बढी संख्यामा व्यावसायिक रूपमा फलफूल खेती विस्तार गर्ने योजना रहेको छ ।

(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)