८० करोड रुपैयाँको लगानी सुनिश्चित भएसँगै रासतालमा दीगो पर्यटन बिकासको अपेक्षा

रामधुनी । रामधुनी नगरपालिका वडा नम्बर ७ मा रहेको रास ताल अब पूर्वको महत्त्वपूर्ण पर्यटकीय गन्तव्य बन्ने छ । कोशी प्रदेश सरकारले आयोजना गरेको प्रथम लगानी सम्मेलनमार्फत ८० करोड रुपैयाँको लगानी सुनिश्चित भएसँगै यो परियोजना अगाडि बढेको हो ।

रास ताल परियोजना प्रदेश लगानी प्राधिकरणमार्फत सञ्चालन गरिनेछ । विस्तृत परियोजना प्रतिवेदन (डिपिआर) तयार गरेपछि दुई वर्षभित्र भौतिक पूर्वाधार निर्माण सम्पन्न गरिने योजना रहेको नगरप्रमुख शंकरलाल चौधरीले जानकारी दिए । होटल, होमस्टे, पिकनिक स्पोट, चिल्ड्रेन पार्कलगायतका पूर्वाधार निर्माणसँगै ताल क्षेत्रलाई दिगो पर्यटनको रुपमा विकास गरिनेछ ।

रास ताल संरक्षणमा स्थानीयबासी, उपभोक्ता समूह र राजनीतिक प्रतिनिधिहरुको समेत सक्रिय सहभागीता रहेको छ । चौधरीका अनुसार संरचना निर्माण गर्दा तालको प्राकृतिक सौन्दर्य र जैविक विविधता जोगाउन विशेष ध्यान दिइनेछ ।

नगर उपप्रमुख तारा थापाले रास ताल विकाससँगै स्थानीय महिलाहरु आत्मनिर्भर बन्ने बताइन् । हस्तकलाका सामग्री, थारु परम्परागत पोशाक तथा परिकारलाई पर्यटकहरुसामु पुर्याउँने तयारीसमेत नगरपालिकाले थालेको छ । प्रमुख प्रशासकीय अधिकृत प्रमोद कुमार चौधरी यस परियोजनाका सूत्रधार मानिन्छन् । उनी प्रारम्भदेखि नै प्रदेश सरकार र लगानी प्राधिकरणसँग समन्वय गर्दै आएको बताइन्छ ।

रास ताललाई ‘पूर्वको फेवा’ पनि भनिन्छ । १० हेक्टर क्षेत्रफलको ताल र वरिपरी ५१ हेक्टर क्षेत्रफलमा विस्तार भइरहेको संरचनाले यसलाई आकर्षक बनाएको छ । ताल वरिपरि निर्मित काठका फलैंचा, बुद्धको मुर्ती, फिसिङ स्पोट, रङ्गीचङ्गी होटल यसका विशेषता हुन् ।

रास ताल २०७१ सालदेखि पर्यटन प्रवद्र्धनका लागि खुला गरिएको थियो । हरियाली जंगलले घेरिएको, शान्त र स्वच्छ वातावरणले भरिएको यो ताल अहिले कोशी प्रदेशको प्रमुख पर्यटकीय गन्तव्य बन्ने दिशामा अघि बढिरहेको छ । तालको वरिपरि सखुवा जातका घना वनले थप प्राकृतिक सौन्दर्यता प्रदान गर्छन् ।

रास ताल पुग्नका लागि इटहरीबाट दुईवटा सहज मार्ग छनोट गर्न सकिन्छ । एक तर्फ, इटहरीबाट करिब ६ किलोमिटर टाढा पर्ने तरहरा बजार पुगेर, त्यसपछि पश्चिमतर्फको भित्री बाटो हुँदै थप ६ किलोमिटर यात्रा गरेपछि ताल पुगिन्छ । अर्को विकल्पका रूपमा, पूर्व–पश्चिम राजमार्गको कान्छी चौकबाट भित्रिएर बक्लौरी हुँदै करिब ८ किलोमिटरको यात्रा तय गर्दा पनि रास तालमा पुग्न सकिन्छ ।
यी दुवै मार्गमा अटो, टेम्पो वा सफारी जस्ता सवारी साधनहरू सहजै उपलब्ध छन्, जसले गर्दा पर्यटकलाई तालसम्मको यात्रा झन् सुविधाजनक र रमाइलो हुन्छ ।

रास तालमा दिगो पर्यटन बिकास हुन सकेको खण्डमा नगरक्षेत्रको अर्थतन्त्रमा ठूलो टेवा पुग्ने नगर प्रमुख चौधरीको बुझाई छ । उनले भने, ‘पर्यटन बिकास अर्थतन्त्रसँग जोडिन्छ । स्थानीय आयस्रोत बन्न सकेको खण्डमा मात्रै यसले सार्थकता पाउँछ । यदि रास तालमा दिगो पर्यटन बिकास हुन सकेको खण्डमा नगर क्षेत्रको अर्थतन्त्रमा ठूलो टेवा पुग्नेछ ।’

(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)