रामधुनी । रामधुनी नगरपालिकाभित्रका सरकारी विद्यालयहरूको यस वर्षको माध्यमिक शिक्षा परीक्षा (एसईई) को नतिजा अत्यन्त कमजोर देखिएको छ । शिक्षा विकास तथा समन्वय इकाई सुनसरीले हाम्रोशब्दलाई उपलब्ध गराएको प्रारम्भिक विवरणअनुसार अधिकांश सामुदायिक विद्यालयको नजिता कमजोर देखिएको हो ।
रामधुनी–२ स्थित शिवनगर माध्यमिक विद्यालयबाट एसईई दिएका १० जना विद्यार्थीमध्ये एक जना पनि ग्रेडेड (पास) हुन सकेनन् । विद्यालयको नतिजा ‘शून्य’ रहेको छ ।
त्यस्तै रामधुनी–४ लालपुरस्थित रामधुनी माध्यमिक विद्यालयबाट परीक्षा दिएका ४२ जनामध्ये केवल ३ जना मात्र ग्रेडेड भएका छन् भने ३९ जना नन–ग्रेडेड भएका छन् । पञ्चायत माध्यमिक विद्यालय रामधुनी–७ मा १७ मध्ये ७ जना मात्र ग्रेडेड भएका छन् भने शनिश्चरे माध्यमिक विद्यालयमा २२ मध्ये ३ जना विद्यार्थी मात्र ग्रेडेड भएका छन् ।
जनता माध्यमिक विद्यालय, रामधुनी–३ बाट एसईई दिएका १०१ जनामध्ये २८ जना मात्र ग्रेडेड भएका छन् भने ७३ जना नन–ग्रेडेड भएका छन् । भादगाउँ सिनुवारी माध्यमिक विद्यालयमा २९ मध्ये ९ जना मात्र ग्रेडेड भएका छन् ।
यता निजी विद्यालयहरूको नतिजा भने तुलनात्मक रूपमा राम्रो देखिएको छ । रामधुनीका ६ ओटा नीजि विद्यालयले सतप्रतिशत नजिता ल्याउँन सफल भएका छन् ।
लर्ड बुद्ध इन्टरनेशनल स्कुल, युनिक सगरमाथा एजुकेशनल एकेडेमी, झुम्का पब्लिक एकेडेमी, र्यापिड लर्निङ इङ्ग्लिस स्कुल, नमुना सामुदायीक विद्यालय, पंचायन विद्या मन्दिरले शतप्रतिशत नतिजा ल्याएका छन् । अन्य निजि विद्यालयको पनि नजिता राम्रो देखिएको छ ।
सामुदायिक विद्यालयको कमजोर नतिजापछि अभिभावक तथा शिक्षा सरोकारवालाले चिन्ता व्यक्त गरेका छन् । वर्षेनि शिक्षा क्षेत्रमा ठूलो सरकारी बजेट खर्च भए पनि सामुदायिक विद्यालयको गुणस्तर सुधार हुन नसक्दा सरकारी विद्यालयप्रति अभिभावकको विश्वास घट्दै गएको देखिएको छ ।
कमजोर नतिजाबारे निर्मम समिक्षा गर्दै आगामी दिनमा त्यसलाई सुधार गरेर अगाडि बढ्ने नगरपालिकाले जनाएको छ । नतिजा भर्खरै सार्वजनिक भएकाले त्यसको समिक्षा र भावी रणनीतिबारे योजना बनाएर अगाडि बढने नगरपालिकाको दावी छ ।
Discussion about this post