संघीय संसद्मा पुग्यो पूर्वन्यायाधीश कार्की आयोगको प्रतिवेदन, संसद् सचिवालयको पुस्तकालयमा रहने

सुनसरी । पूर्वन्यायाधीश गौरीबहादुर कार्की नेतृत्वमा गठित जाँचबुझ आयोगको प्रतिवेदन संघीय संसद् सचिवालयमा पुगेको छ ।

सचिवालयका सहसचिव तथा प्रवक्ता एकराम गिरीका अनुसार उक्त प्रतिवेदन हाल संसद् सचिवालयको पुस्तकालयमा राखिएको छ ।

गत भदौ २३ र २४ गते भएको जेनजी आन्दोलनका क्रममा भएका घटनाक्रम तथा सरकारी पक्षबाट भएको भनिएको दमनबारे छानबिन गर्न सरकारले २०८२ असोज ५ गते कार्कीको नेतृत्वमा तीन सदस्यीय आयोग गठन गरेको थियो। आयोगमा पूर्व एआईजी विज्ञानराज शर्मा र कानुनविद् विश्वेश्वर भण्डारी सदस्य थिए ।

आयोगले आफ्नो प्रतिवेदन २०८२ फागुन २४ गते सरकारलाई बुझाएको थियो । तत्कालीन सरकारले उक्त प्रतिवेदन सार्वजनिक गर्ने बताएको भए पनि हालसम्म पूर्णरूपमा सार्वजनिक भएको छैन । यद्यपि, आयोगले गरेका केही सिफारिसहरू भने वर्तमान सरकारले कार्यान्वयनमा लगिसकेको जनाइएको छ ।

प्रतिवेदनमा तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखकलाई फौजदारी कसुरमा कारबाही गर्न सिफारिस गरिएको उल्लेख छ । आयोगको प्रतिवेदन संसद्मा पुगेसँगै यसको अध्ययन र थप छलफल हुने अपेक्षा गरिएको छ ।