सुनको मूल्य पुनः ३ लाख नाघ्यो, चाँदीसमेत बढ्यो

सुनसरी । नेपाली बजारमा सुनको मूल्यले पुनः नयाँ कीर्तिमान कायम गरेको छ । आइतबार सुनको मूल्य प्रतितोला ३ लाख १ हजार ७ सय रुपैयाँ पुगेको हो ।

नेपाल सुनचाँदी व्यवसायी महासंघका अनुसार सुनको मूल्य अघिल्लो कारोबार दिनको तुलनामा ४ हजार ८ सय रुपैयाँले बढेको हो । अघिल्लो दिन सुन प्रतितोला २ लाख ९६ हजार ९ सय रुपैयाँमा कारोबार भएको थियो ।

पछिल्लो चार कारोबार दिनमै सुनको मूल्य प्रतितोला १७ हजार ९ सय रुपैयाँले बढेको छ । गत मंगलबार प्रतितोला २ लाख ८३ हजार ८ सय रुपैयाँ रहेको सुनको मूल्य निरन्तर उकालो लाग्दै आइतबार ३ लाख रुपैयाँको सीमासमेत पार गरेको हो ।

सुनसँगै चाँदीको मूल्यमा पनि वृद्धि भएको छ । महासंघका अनुसार चाँदी प्रतितोला ६५ रुपैयाँले बढेर ४ हजार ६ सय ४५ रुपैयाँ पुगेको छ । अघिल्लो दिन चाँदी प्रतितोला ४ हजार ५ सय ८० रुपैयाँमा कारोबार भएको थियो ।

चार कारोबार दिनअघिको तुलनामा चाँदीको मूल्य पनि २ सय ६५ रुपैयाँले बढेको छ । गत मंगलबार चाँदी प्रतितोला ४ हजार ३ सय ८० रुपैयाँमा कारोबार भएको थियो ।

यसरी पछिल्ला दिनमा सुनचाँदी दुवैको मूल्य लगातार बढ्दै जाँदा नेपाली बजारमा सुनको मूल्यले नयाँ उचाइ कायम गरेको छ ।