रामधुनी । सुनसरीको रामधुनी नगरपालिकाका बासिन्दाले विराटनगरस्थित नोबेल मेडिकल कलेज शिक्षण अस्पतालमा उपचार गराउँदा २० प्रतिशत छुट पाउने भएका छन् । नगरबासीलाई सुलभ मूल्यमा गुणस्तरीय स्वास्थ्य सेवा उपलब्ध गराउने उद्देश्यले नगरपालिका र अस्पतालबिच द्विपक्षीय सम्झौता भएको हो ।
साउन २० गते भएको सम्झौता अनुसार रामधुनीका बासिन्दाले नोबेल अस्पतालमा शल्यक्रिया लगायतका विभिन्न उपचार सेवामा २० प्रतिशत छुट पाउनेछन् । यो सुविधा २०८३ साउन २० गतेदेखि २०८४ असार मसान्तसम्म कायम रहने नगरपालिकाले जनाएको छ । सम्झौता पत्रमा अस्पतालका तर्फबाट महाप्रबन्धक दिपेश राई र जनसम्पर्क अधिकृत नविन दाहाल तथा नगरपालिकाका तर्फबाट कार्यवाहक नगर प्रमुख तारा थापाले हस्ताक्षर गरेका छन् ।
नेपाल सरकारद्वारा सञ्चालित स्वास्थ्य बिमा, आमा सुरक्षा तथा विपन्न नागरिक औषधि उपचार कोषको सीमा सकिएपछि बाँकी रहने उपचार खर्चमा यो छुट लागु हुनेछ । स्वास्थ्य बिमामा आवद्ध नभएका वा बिमा निष्कृय रहेका नगरबासीले पनि यो सुविधा पाउनेछन् ।
छुट सुविधा प्राप्त गर्नका लागि बिरामीले रामधुनी नगरपालिका वा सम्बन्धित वडा कार्यालयको सिफारिस पत्र, नागरिकता वा परिचयपत्रको प्रतिलिपि साथमा लानुपर्नेछ । १६ वर्ष मुनिका बालबालिकाको हकमा भने जन्मदर्ता प्रमाणपत्र अनिवार्य गरिएको छ ।
यसैबिच, झुम्का आधारभूत अस्पताल वा स्थानीय स्वास्थ्य चौकीबाट थप उपचारका लागि सिफारिस भई आउने कोशी प्रदेशका अन्य बिरामीले समेत जाँच कागजात र रेफरल पत्रका आधारमा यो सुविधा पाउने सम्झौतामा उल्लेख छ ।
तर, प्रत्यक्ष स्वास्थ्य उपचार बाहेकका आइभिएफ, प्लास्टिक सर्जरी, कस्मेटिक सर्जरी, क्याबिन सुविधा, औषधि तथा इम्प्लान्टसहितका चिकित्साजन्य सामग्रीमा भने छुट लागु नहुने अस्पताल प्रशासनले जनाएको छ ।
नगरबासीलाई गुणस्तरीय स्वास्थ्य सेवामा सहज पहुँच पु-याउन यो सम्झौता गरिएको कार्यवाहक नगर प्रमुख तारा थापाले बताइन् । उनले भनिन्, ‘नागरिकलाई उपचारमा पर्ने आर्थिक भार कम गर्न नोबेल अस्पतालसँग सम्झौता गरेका हौँ । यसबाट विशेष गरी विपन्न तथा बिमा सुविधा सकिएका नगरबासीले ठुलो राहत पाउनेछन् ।’
Discussion about this post