सुनसरी । सुनसरी क्षेत्र नं. ३ का विभिन्न विकास तथा जनजीविकासँग जोडिएका समस्या पटक-पटक संसदमा उठाए पनि कार्यान्वयनमा ढिलाइ भएको भन्दै प्रतिनिधिसभा सदस्य अशोक कुमार चौधरीले सरकारसँग स्पष्ट जवाफ र समयसीमासहितको कार्ययोजना माग गरेका छन् ।
प्रतिनिधिसभाको बैठकमा बोल्दै चौधरीले सुनसरीको प्रमुख व्यापारिक केन्द्र दुहबी बजारको सडक जीर्ण अवस्थामा रहेको भन्दै तत्काल सुधारको आवश्यकता औँल्याए । सडकमा ठाउँठाउँमा ठूला खाल्डाखुल्डी परेकाले नागरिक सहज आवागमनको सट्टा दुर्घटनाको जोखिम मोलेर यात्रा गर्न बाध्य भएको उनले बताए ।
उनले इटहरी नगर अस्पतालमा एमडीजीपी चिकित्सकको व्यवस्था गर्नुपर्ने विषय पनि संसदमा उठाएका छन् । त्यस्तै, बूढी खोला, टेङ्ग्रा खोला र केसलिया खोलाको तटबन्धसँग सम्बन्धित समस्या पनि आफूले निरन्तर उठाउँदै आएको चौधरीको भनाइ छ ।
‘जनजीविकासँग जोडिएका विषय मैले सुनसरी क्षेत्र नं. ३ का समस्याका रूपमा पटक-पटक संसदमा उठाएको छु । मेरो संसदीय यात्राका पहिलो ३८ महिना र त्यसपछिका ७ महिना गरी ४५ महिनाको अवधिमा यी विषयमा पटक-पटक आवाज उठाएको छु । छलफल पनि भयो,’ उनले भने ।
तर पटक-पटक आश्वासन पाए पनि समस्या समाधान र विकासको प्रत्यक्ष अनुभूति जनताले गर्न नपाएको चौधरीको भनाइ छ ।
‘मेरा क्षेत्रका जनताले आश्वासनको छल त पटक-पटक पाए, तर अब विकासको फल कहिले पाउने हो ?’ उनले प्रश्न गरे ।
चौधरीले आफूले उठाएका विषयमा सरकारबाट स्पष्ट जवाफ दिनुपर्ने र काम सम्पन्न गर्ने समयसीमा तोकेर कार्ययोजना सार्वजनिक गर्नुपर्ने माग गरे ।
सांसद चौधरी सुनसरी-३ बाट राष्ट्रिय स्वतन्त्र पार्टीका तर्फबाट प्रत्यक्ष निर्वाचित प्रतिनिधिसभा सदस्य हुन् ।
Discussion about this post