रामधुनी । अखिल नेपाल यातायात मजदुर संघको आयोजनामा र नेपाल कम्युनिष्ट पार्टी (माओवादी केन्द्र) रामधुनी ६ नम्बर वडा समितिको सहयोगमा १३६ औं अन्तर्राष्ट्रिय श्रमिक दिवसको अवसरमा रक्तदान कार्यक्रम सम्पन्न भएको छ । मंगलबार रामधुनी नगरपालिका–६ बक्लौरीमा सम्पन्न कार्यक्रममा ३६ जनाले रक्तदान गरेका छन् ।
कार्यक्रममा माओवादी केन्द्रकी केन्द्रीय सदस्य तथा पूर्व राज्यमन्त्री रामकुमारी चौधरी, नेपाली कांग्रेस रामधुनी नगर सभापति सुदीप अधिकारी, माओवादी रामधुनी नगर अध्यक्ष बलराम चौलागाईँ लगायत स्थानीय बासिन्दा, श्रमिक युवा तथा पार्टी कार्यकर्ताहरूको उल्लेखनीय सहभागिता रहेको थियो ।
कार्यक्रममा बोल्दै प्रमुख अतिथि चौधरीले श्रमिकहरूको अधिकार र योगदानको कदर गर्न समाज, सरकार र राजनीतिक दलहरू सबै एकजुट भएर लाग्नुपर्ने आवश्यकता औंल्याइन् । श्रमिक दिवसका अवसरमा आयोजित यस किसिमको कार्यक्रमले समुदायमा सामाजिक सहकार्य र श्रमिकप्रति सम्मान अभिवृद्धि गर्न टेवा पुग्ने उनको भनाई छ ।
