रामधुनी । सुनसरी प्रतिनिधिसभा क्षेत्र नं ४ को मत गणना आज दिउँसो १ बजेदेखि सुरु हुने भएको छ ।
यो क्षेत्रमा कुल ८१ हजार २ सय ३३ मत खसेको छ । बहालवाला मन्त्री ज्ञानेन्द्र बहादुर कार्कीको निर्वाचन क्षेत्र रहेको सुनसरी–४ मा १ लाख २८ हजार ६५ मतदाता रहेका थिए ।
प्रदेशसभा तर्फ १ मा ४१ हजार ५ सय ९ मत खसेको छ भने प्रदेश सभा २ तर्फ ३९ हजार ७ सय २४ खसेको छ । प्रदेश सभा १ मा ६७ हजार ६ सय ३३ र प्रदेश सभा २ मा ६० हजार ४ सय ३२ मतदाता रहेका थिए।
सुनसरी ४ को प्रदेश सभा १ अन्तर्गत वराहक्षेत्र नगरपालिकाका ६ वटा वडामा २१ हजार ९ सय ९ मत खसेको थियो । रामधुनी नगरपालिको ४ नम्बर वडामा २ हजार ९ सय ८ र कोसी गाउँपालिकामा १६ हजार ६ सय २८ मत खसेको थियो । त्यस्तै प्रदेश सभा २ तर्फ हरिनगर गाउँपालिकामा १४ हजार १ सय २९, भोक्राहा गाउँपालिकामा १६ हजार ६ सय, इनरुवा नगरपालिकाको ३ वटा वडामा ८ हजार ९ सय ९५ मत खसेको निर्वाचन कार्यालयले जानकारी दिएको छ । निर्वाचन कार्यालयका अनुसार सुनसरी ४ को मतगणना इनरुवा स्थित भगवती माध्यमिक विद्यालयमा गरिनेछ । मतगणना १ बजेबाट सुरु हुनेछ ।
राजनैतिक रूपमा ऐतिहासिक र महत्त्वपूर्ण रहेको सुनसरी ४ मा नेपाली काँग्रेस नेतृत्वको लोकतान्त्रिक वाम गठबन्धनबाट नेपाल सरकारका सञ्चार तथा सूचना प्रविधि मन्त्री ज्ञानेन्द्रबहादुर कार्की, एमाले–जसपा गठबन्धनबाट एमालेका केन्द्रीय सदस्य जगदीश प्रसाद कुसियैत, राप्रपाबाट विद्यानन्द यादव, राष्ट्रिय स्वतन्त्र पार्टीबाट जीवन श्रेष्ठ, लोसपाबाट कुञ्जिलाल यादव, स्वतन्त्र उम्मेदवार डाक्टर खालिद हुसेन, केवक कार्की लगाएका उम्मेदवार रहेका छन् । प्रतिनिधि सभामा नेपाली काँग्रेसका कार्की र एमालेका कुसियैत बिच कडा प्रतिस्पर्धा हुने अनुमान गरिएको छ ।
त्यस्तै प्रदेश सभा १ मा लोकतान्त्रिक वाम गठबन्धनबाट काँग्रेसका सदानन्द मण्डल, एमाले–जसपा गठबन्धनबाट जसपाका परशुराम बस्नेत, लौरो अभिनानबाट नगेन्द्र बस्नेत, लोसपाका नुनुलाल उराँवको उम्मेदवारीलाई महत्त्वको साथ हेरिएको छ । प्रदेश सभा १ मा राप्रपाबाट राजकुमार साह, स्वतन्त्र उम्मेदवार रविन राई लगायतको उम्मेदवारी रहेको छ । त्यस्तै प्रदेश सभा २ मा लोकतान्त्रिक वाम गठबन्धनबाट हाजी इस्राराईल मन्सुरी, एमाले–जसपा गठबन्धनबाट एमालेका अब्बास अन्सारी र राप्रपाका चन्दन मेहताका बिच कडा प्रतिस्पर्धा हुने अनुमान गरिएको छ ।
सुनसरी–४ लाई ऐतिहासिक निर्वाचन क्षेत्रको रूपमा लिने गरिन्छ । २०१५ सालको आम निर्वाचनमा बिपी कोइराला सुनसरी–४ बाटै विजयी बनेर देशको पहिलो जन निर्वाचित प्रधानमन्त्री बनेका थिए । त्यस्तै २०४८ सालको प्रतिनिधि सभाको निर्वाचनमा सुनसरी–४ वाटै विजयी बनेर गिरिजाप्रसाद कोइराला देशको प्रधानमन्त्री बनेको थिए ।
Discussion about this post