रामधुनी । नेकपा एमाले रामधुनी नगर कमिटीको आगामी अधिवेशनमा अध्यक्ष पदका लागी ६ जना आकांक्षी देखिएका छन् । अधिवेशनको औपचारिक मिति घोषणा भइनसकेको भए पनि आगामी असार २५ गतेसम्म अधिवेशन गर्न सुनसरी जिल्ला कमिटीले समयसीमा तोकेपछि आकांक्षीहरुले दौडधुप बढाएका हुन् ।
नयाँ नेतृत्वको लागि वर्तमान अध्यक्ष योगेन्द्र खडका पुनः दोहोरिने मनस्थितिमा छन् भने वर्तमान उपाध्यक्ष प्रदिप खनाल अध्यक्ष बन्ने तयारीमा छन् । मुख्य दावेदारको रुपमा वर्तमान अध्यक्ष खडका र उपाध्यक्ष खनाल देखिए पनि चुडामणी घिमिरे, बलबहादुर कार्की, पुस्कर कार्की र राजकुमार चौधरीलेसमेत अध्यक्षमा आकांक्षा राखेका छन् । आकांक्षीमध्ये घिमिरे र बलबहादुर कार्की पार्टी पूर्व सुनसरी जिल्ला कमिटी सदस्य हुन् भने पुस्कर कार्की पार्टीका विभिन्न जनवर्गिन संगठन र विभिन्न सामाजिक संघ–संस्थाको नेतृत्व गरिसकेका व्यक्ति हुन् । वर्तमान नगर कमटि उपसचिव रहेका राजकुमार चौधरी थारु कल्याणकारीणि सभा रामधुनी नगर सभापतिसमेत हुन् ।
अध्यक्षका दावेदारहरुले आफ्नो पक्षमा समर्थन जुटाउन तथा पदाधिकारीमा आफ्नो टिम बलियो बनाउन भूगोलमा प्रभावशाली मानिएका नेताहरुको साथ खोजिरहेका छन् । माथिल्लो कमिटीमा रहेका र भूगोलमा प्रभावशाली मानिएका स्थानीय नेताहरुको समर्थन जुटाउनका लागि अध्यक्षका आकांक्षीहरुले निकै दौडधुप बढाएको देख्न सकिन्छ । रामधुनी भूगोलका नेताहरु सुनसरी जिल्ला कमिटी सचिव राम कोइराला, पूर्व जिल्ला उपाध्यक्ष नन्द कुमार बस्नेत, जिल्ला कमिटी सदस्यद्वय डेगराज फुयाल, रुद्र बस्नेत, रामधुनी नगरपालिकाका मेयर शंकरलाल चौधरी, तत्कालीन भासी गाविसका उपाध्यक्षसमेत रहेका नेता नारायण काफ्ले लगायतको समर्थन जुटाउन अध्यक्षका दावेदारहरु सक्रिय देखिन्छन् ।
रामधुनी भुगोलका एक प्रभावशाली नेताका अनुसार अध्यक्षमा धेरैको आकांक्षा देखिए पनि २ जनाबीच प्रतिस्पर्धाको संभावना रहेको छ । ‘सहमतिमा अध्यक्ष छनौट हुनसक्छ । यदि भएन भने मुख्य २ जना बढिमा ३ जनाबीच प्रतिस्पर्धाको संभावना देखिन्छ ।’ उनले भने, ‘अन्य आकांक्षीहरु हुनुहुन्छ, उहाँहरु उपाध्यक्ष, सचिव र उपसचिवमा बस्नुहुन्छ । यहाँ जिम्मेवारी नपाएका साथीहरुको व्यवस्थापन माथिल्लो कमिटीमा हुन्छ ।’
जिल्ला कमिटीले असार २५ को समयसीमा दिएर अधिवेशन गर्न भने पनि नगर कमिटीले औपचारिक मिति भने घोषणा गरेको छैन । असार १५ देखि २० गतेको बीचमा अधिवेशनको मिति तोक्ने तयारी गरिएको नगर उपाध्यक्ष प्रदिप खनालले हाम्रोशब्दलाई जानकारी दिए ।
Discussion about this post