थारु समुदायको कला, संस्कृतिको संरक्षण नगरपालिकाको प्राथमिकता : मेयर चौधरी

रामधुनी । रामधुनी नगरपालिकाका नगरप्रमुख शंकरलाल चौधरीले थारु समुदायको मौलिक परम्परामा आधारित कला र संस्कृतिको संरक्षणलाई नगरपालिकाले प्राथमिकतामा राखेर अगाडि बढिरहेको बताएका छन् । झुम्कामा शुक्रबार आयोजित ‘थारु चलचित्र तथा सांस्कृतिक महोत्सव–२०८२’ लाई सम्बोधन गर्दै नगरप्रमुख चौधरीले परम्परागत सम्पदा नयाँ पुस्तासम्म पुर्याउँन नगरपालिका सक्रिय रहेको बताए ।

उनका अनुसार थारु कल्याणकारीणि सभा, ग्रामथान संरक्षण समिति लगायतका संघसंस्थासँगको सहकार्यमा मौलिक संस्कृति र परम्परालाई जीवन्त राख्ने उद्देश्यले विभिन्न कार्यक्रम सञ्चालन भइरहेका छन् । ‘ग्रामथान सबै थारु जातिको हो । त्यसैले ग्रामथान संरक्षण गर्नका लागि त्यसमा बजेट राखिएको छ । त्यो कार्यक्रम पनि भइरहेको छ’ उनले भने, ‘सबै ग्रामथानमा युवाहरुलाई भेला पारीपारी अहिलेको पुस्ताले ग्रामथानमा रहेको ढिम्का, ढिम्की, माटो चिन्दैन, जान्दैन ! के हो के हो ? त्यसैले त्यो जान्नका लागि ग्रामथान संरक्षण समितिलाई हामीले बजेटको व्यवस्था गरेका छौँ ।’

युवालाई थारु कला, संस्कृति र सम्पदासँग जोड्नेतर्फ नगरपालिका केन्द्रित रहेको उहाँको भनाई छ ।