शान्ति सुरक्षामा रामधुनी : इलाका प्रहरीको भवन बन्ने, नगरपालिकाद्वारा नगर प्रहरी सञ्चालन

रामधुनी । रामधुनी नगरपालिकाले शान्ति सुरक्षा सुदृढीकरणका लागि नेपाल प्रहरी र नगर प्रहरी दुबै संरचना मजबुत बनाउन महत्वपूर्ण कदम चालेको छ । इलाका प्रहरी कार्यालयको स्थायी भवन निर्माणका लागि संघीय सरकारले आगामी आर्थिक वर्ष २०८२/०८३ को बजेटमार्फत एक करोड रुपैयाँ विनियोजन गरेको छ ।

नगर प्रमुख शंकरलाल चौधरीका अनुसार प्रहरी कार्यालयको भवन निर्माण कार्यलाई क्रमागत ढंगले अघि बढाउने योजना अनुरूप संघीय सरकारले एक करोड बजेट विनियोजन गरेको हो । उनले भने, ‘यो प्रहरी कार्यालयको स्थापना रामधुनी नगरको समग्र शान्ति सुरक्षाका लागि कोसेढुंगा सावित भएको छ ।’

भवन निर्माणका लागि रामधुनी–६ स्थित ढेडिगाउँमा २०७४ सालमै स्थानीय दाताहरूले पाँच कट्ठा जग्गा प्रदान गरिसकेका थिए । तर आवश्यक प्रशासनिक प्रक्रिया र बजेट अभावका कारण भवन निर्माण कार्य सुरु हुन सकेको थिएन । गत वर्ष मात्रै इलाका प्रहरी कार्यालयको स्थापना औपचारिक रुपमा गरिएको भए तापनि हाल प्रहरी झुम्कामा रहेको सुनसरी–मोरङ सिँचाइ आयोजनाको भवनमा अस्थायी रूपमा कार्यरत छन् । अब भने बजेट सुनिश्चित भएसँगै स्थायी भवन निर्माणको बाटो खुलेको छ । नगर प्रमुख चौधरीले प्रहरी कार्यालय स्थापनाका लागि संघीय, प्रदेश र स्थानीय तहका जनप्रतिनिधि, प्रशासन, राजनीतिक दल र नागरिक समाजसँगको समन्वयले भूमिका खेलेको भन्दै आभार प्रकट गरे ।

यस्तै, नगरपालिकाले शान्ति सुरक्षालाई थप व्यवस्थित बनाउन १२ जना नगर प्रहरी नियुक्त गरेको छ । नगरपालिकाले ‘नगर प्रहरी ऐन–२०८१’ अनुसार दर्जासहितको संरचना निर्माण गरेर नगर प्रहरी सञ्चालनमा ल्याएको हो । नगर प्रहरीको जिम्मेवारीमा नगर क्षेत्रमा शान्ति सुरक्षा कायम गर्नु, हाटबजार व्यवस्थापन, खुल्ला चौपाया नियन्त्रण, सार्वजनिक सम्पत्ति संरक्षण, अनधिकृत निर्माण नियन्त्रण र नगरपालिकाका नियम कार्यान्वयनमा सहयोग पु¥याउनु पर्छ ।

अब रामधुनीमा नेपाल प्रहरीको इलाका प्रहरी कार्यालय स्थायी रूपमा निर्माण हुँदैछ भने नगर प्रहरी पनि पूर्ण रूपमा सञ्चालनमा आएको छ । दुबै संरचनाको सहकार्यले नगर भित्रको शान्ति सुरक्षा प्रणाली अझ मजबुत र व्यवस्थित हुने विश्वास नगर प्रमुख चौधरीको छ ।
उनले भने, ‘नगर भित्रै इलाका प्रहरी कार्यालयको स्थापनाले अपराध नियन्त्रण, शान्ति सुरक्षा र कानुनी शासनको प्रत्याभूति दिन्छ । नगर प्रहरीको सक्रियताले नगरपालिकाका नियम कार्यान्वयन र नगर व्यवस्थापनलाई थप सहज बनाएको छ ।’ नगरभित्रको सुरक्षा संयन्त्र बलियो भएसँगै रामधुनी नगरलाई सुरक्षित, व्यवस्थित र शान्तिपूर्ण बनाउने यात्रामा यो ठूलो उपलब्धि हुने नगर प्रमुख चौधरीले बताए ।

(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)