व्यवस्थित रामधुनीको न्यायीक इजलास, न्यायीक प्रकृया सिक्न पाइने अध्ययन केन्द्रको रुपमा बिकास गरिने

रामधुनी । रामधुनी नगरपालिकाको न्यायीक समितिको इजलास व्यवस्थित र शालीन रूपमा तयार पारिएको छ । नगरपालिकाको भवनभित्र रहेको न्यायीक इजलासको भौतिक पूर्वाधार निकै आकर्षक र प्रयोगमुखी देखिन्छ, जहाँ न्याय सम्पादनसँग सम्बन्धित बैठकहरू सञ्चालन हुने गरेका छन् ।

न्यायीक इजलासमा तीन जना पदाधिकारीहरूका लागि अगाडि छुट्टाछुट्टै आसन र नामको बोर्ड राखिएको छ, जसले इजलासको गम्भीरता झल्काउँछ । न्याय सम्वन्धी छलफल, फैसलाहरू तथा पक्ष–विपक्षका तर्क प्रस्तुत गर्न मिल्ने गरी इजलासको संरचना मिलाइएको छ । साथै, सार्वजनिक उपस्थितिका लागि बैठककक्षमा परम्परागत काठका कुर्सीहरू पनि रहेका छन् ।

न्यायीक समितिको कामलाई अझ जनमुखी र शैक्षिक बनाउने उद्देश्यसहित नगरपालिकाले यसलाई अध्ययन केन्द्रको रूपमासमेत विकास गर्ने तयारी थालेको छ । नगर उपप्रमुख एवं न्यायीक समितिकी संयोजक तारा थापाले इजलासलाई अध्ययन केन्द्रका रूपमा प्रवद्र्धन गरिने बताइन । उनले भनिन्, ‘विद्यार्थीहरूलाई न्यायीक प्रक्रिया, स्थानीय तहमा समाधान हुने विवाद, मेलमिलाप लगायत विषयमा जानकारी दिनका र अन्यन्त्रबाट जोकोहि अध्यन गर्न आउँने बनाउँनका लागि वातावरण तयार गरिँदैछ ।’

उनका अनुसार, विद्यालय, कलेजका विधार्थी, कानुन विषय पढ्ने विद्यार्थी तथा सचेत नागरिकका लागि यो इजलास अवलोकन तथा अभ्यासको केन्द्र बन्नेछ । त्यसका लागि नगरपालिकाले आवश्यक योजना निर्माण गरिरहेको जानकारी पनि उपप्रमुख थापाले दिइन् ।

न्यायीक समितिबाट खासगरी साना विवाद, घरेलु हिंसा, सम्पत्ति विवाद, छिमेकी झैझगडा लगायत विषयको निष्पक्ष समाधान गरिने गरेको छ । इजलासको भौतिक स्वरूपलाई अझै स्तरीय बनाएर न्यायको पहुँच सर्वसाधारणसम्म पुगोस् भन्ने उद्देश्यले नगरपालिका अग्रसर भएको थापाले बताइन । नगरपालिकाका अनुसार करिब ५ लाख बजेटबाट व्यवस्थित इजलास निर्माण गरिएको हो ।

(रामधुनीमा ६० काम ६० समाचार : स्थानीय तह निर्वाचन २०७९ देखि आजम्म समाचार श्रृङखला अन्तर्गत)