थारु समुदायको सांस्कृतिक भूमि ग्रामथान संरक्षणका लागि चाँडै ऐन बनाउँनुपर्छ : सिता थरुनी

रामधुनी । ग्रामथान संरक्षण समिति रामधुनीकी अध्यक्ष सिता थरुनीले थारु समुदायको सांस्कृतिक भूमि ग्रामथानको संरक्षणका लागि स्थानीय तहले चाँडै ऐन बनाउनुपर्ने बताएकी छन् ।

ग्रामथानको नीतिगत संरक्षणका विषयमा शुक्रबार रामधुनीमा आयोजित कानुनी परामर्श गोष्ठीमा बोल्दै थरुनीले नगरपालिकाले ग्रामथान संरक्षणसम्बन्धी ऐन निर्माणलाई प्राथमिकता दिनुपर्ने बताएकी हुन् ।

उनका अनुसार ग्रामथान संरक्षण समितिले रामधुनी नगरपालिकालाई ग्रामथान संरक्षणसम्बन्धी नमुना ऐनको मस्यौदा हस्तान्तरण गरिसकेको छ । नगर क्षेत्रभित्र रहेका ग्रामथानको लगतसमेत संकलन भइसकेको उनले जानकारी दिइन् ।

‘हामीले समितिको तर्फबाट नगरपालिकालाई नमुना ऐनको मस्यौदा दिएका छौं । नगर क्षेत्रका सबै ग्रामथानको लगत पनि संकलन भइसकेको छ,’ उनले भनिन्, ‘आगामी हिउँदे नगरसभाबाट ग्रामथान संरक्षणका लागि ऐन बन्छ भनेर मेयरसाबले पनि भन्नुभएको छ । चाँडोभन्दा चाँडो ऐन बन्न सक्यो भने भावी पुस्तालाई यो भूमि जस्ताको त्यस्तै हस्तान्तरण गर्न सकिन्छ । हामी त्यो अभियानमा छौँ ।’

थरुनीले ऐन निर्माण भएपछि ग्रामथानको संरक्षण, व्यवस्थापन र उपयोगलाई नीतिगत रूपमा व्यवस्थित गर्न सहज हुने बताइन् । थारु समुदायका विभिन्न सांस्कृतिक तथा धार्मिक गतिविधिमा ग्रामथानको महत्त्वपूर्ण भूमिका रहेको उनको भनाइ छ ।

थारु समुदायमा जन्मदेखि मृत्युसम्मका विभिन्न संस्कार तथा सांस्कृतिक गतिविधिमा ग्रामथानको प्रयोग हुँदै आएको छ । ग्रामथानलाई थारु समुदायको सांस्कृतिक पहिचानसँग जोडिएको स्थलका रूपमा लिइन्छ ।