धार्मिक पर्यटकीय तीर्थस्थल रामधुनी मन्दिर आउने बाटो अव्यवस्थित हुँदा समस्या

रामधुनी । सुनसरीको रामधुनी नगरपालिकामा पर्ने धार्मिक पर्यटकीय तीर्थस्थल रामधुनी मन्दिर आउने बाटो अव्यवस्थित हुँदा तीर्थयात्री र स्थानीय यात्रीहरुलाई समस्या भएको छ ।

झुम्का बजारदेखि रामधुनी मन्दिरसम्मको सडक साँघुरो हुनुका साथै विभिन्न ठाउँमा खाल्डाखुल्डी परेर बिग्रिदै गएका कारण समस्या भएको हो ।

नगरकै महत्वपूर्ण पर्यटकीय तिर्थस्थलको रुपमा रामधुनी मन्दिरलाई लिने गरिएको भए पनि सडक व्यवस्थित बनाउन नसक्दा र भएको सडकसमेत मर्मत गर्न नसक्दा तिर्थयात्री र स्थानीय हैरान हुने गरेका छन् ।

रामधुनी मन्दिरमा आउने बाटो बिग्रिदा दर्शन गर्न आउने आन्तरिक र वाह्य तीर्थयात्रीलाई समस्या हुने गरेको रामधुनी बाबा वनखण्डी मन्दिर गुठी व्यवस्थापन समितिका अध्यक्ष डिल्ली कार्कीले बताए ।

रामधुनी नगरपालिका मेयर शङ्करलाल चौधरीले तत्काल सडक मर्मतका लागि बजेटसमेत विनियोजन गरिएको र भबिष्यमा बाटो थप फराकिलो र व्यवस्थित बनाउने योजनामा नगरपालिका रहेको बताए ।

रामधुनी मन्दिर आफ्नै किसिमको धार्मिक महत्व र अस्तित्व बोकेको एउटा पौराणिक ऐतिहासिक धरोहरका रूपमा परिचित रहेको छ । त्रेतायुगमा भगवान राम यस क्षेत्रमा आएर वनवासको क्रममा धुनी जगाई एक रात बास बसेको बताइन्छ ।