दशैँको मुखमा सुनसरीको रामधुनीका तीन मजदुर भारतको जम्मू–कश्मीरमा प्रहरी नियन्त्रणमा

रामधुनी । दशैँको मुखमा भारतको जम्मू–कश्मीर क्षेत्रमा श्रम गर्न गएका तीनजना मजदुर भारतीय प्रहरीको नियन्त्रणमा परेका छन् ।

सुनसरीको रामधुनी नगरपालिका वडा नम्बर ९ घर भएका २५ बर्षीय राम विलास सदा, ३० बर्षीय अनिल रिषिदेव र २३ बर्षीय विवेक सदा (मुसहर) विगत पाँच दिनयता भारतीय प्रहरी नियन्त्रणमा रहेका परिवारको भनाई छ ।

रामविलासकी आमा ललियादेवी सदाका अनुसार सुरुमा कश्मीर क्षेत्रमा काम गर्न गएका उनीहरु ठेक्दारसँग ज्यालाको बिषयमा विवाद भएपछि कामको खोजिमा जम्मू क्षेत्रमा जाने क्रममा प्रहरी नियन्त्रणमा परेका हुन् ।

सोमबार (आज) रामधुनी–९ का वडा अध्यक्ष घनश्याम चौधरीलाई भेटेर परिवारका सदस्यहरुले उनीहरुको उद्धार गरिदिन आग्रह गरेका छन् । हाम्रोशब्दसँगको कुराकानीका क्रममा वडा अध्यक्ष चौधरीले आफ्ना वडावासी युवाहरुको उद्धारका लागि आजै जिल्ला प्रशासन कार्यालय सुनसरी पुगेर प्रमुख जिल्ला अधिकारी हुमकला पाण्डेलाई घटनाबारे जानकारी गराएको र उनीहरुलाई जसरी पनि घर फर्काउने वातावरण मिलाउँन आग्रह गरेको बताए ।

‘ती साथीहरुका परिवार वडामा आउनुभएको थियो । लगत्तै म जिल्ला प्रशासन कार्यालय सुनसरी पुगेर प्रमुख जिल्ला अधिकारीसमक्ष कुरा राखेको छु ।’ उनले भने, ‘सिडिओ सावले पनि घटनाबारे सत्यतथ्य बुझेर उनीहरुलाई नेपाल फर्काउने पहल गर्न प्रहरीलाई भन्नूभएको छ ।’

घटनाबारे जानकारी प्राप्त भएको र प्रहरीको च्यानलमार्फत सुचना लिने काम भइरहेको प्रमुख जिल्ला अधिकारी पाण्डेले बताइन ।  ‘अघि वडा अध्यक्ष ज्यू आउनुभएको थियो । मैले डिटेल प्रहरीलाई दिनू भनेको छु । प्रहरीले आफ्नो इन्टरनल च्यानलमार्फत पारी (भारत) सँग कोअर्डिनेसन गर्छ भनेको थिए । सुपुर्दर्गी सन्धी नहुनाले औपचारीक च्यानलमार्फत जान मिल्दैन ।’ हाम्रोशब्दसँगको कुराकानीमा प्रजिअ पाण्डेले भनिन्, ‘वडा अध्यक्ष ज्यूले प्रहरीलाई डिटेल दिनुभएको छ । अब अनौपचारीक एक-अर्काको रिलेसनको आधारमा कुरा गर्नुपर्छ । प्रहरीले अनौपचारीक च्यानलमार्फत पारी सुचना फर्वाड गरिसकेको छ ।’