रामधुनी । सुनसरीको झुम्कावासीले अब गुणस्तरीय खानेपानी पाउने भएका छन् । ३६ करोड ५३ लाख ८५ हजार लगानीमा सुरु भएको खानेपानी आयोजनाको काम करिब ६० प्रतिशत सम्पन्न भइसकेको छ । आयोजनाको सम्पुर्ण काम सम्पन्न भएपछि झुम्कावासीले गुणस्तरीय पानी प्रयोग गर्न पाउनेछन् ।
झुम्कावासीलाई गुणस्तरीय खानेपानी उपलब्ध गराउने उद्देश्यले २ बर्ष अगाडि आयोजनाको काम सुरु गरिएको थियो । करिब ६१ करोड लागत अनुमान गरिएको आयोजनाको काम ठेक्का प्रकृयामार्फत ३६ करोड ५३ लाख ८५ हजारमा गर्नेगरि शर्मा भिमेश्वर जेभीले ठेक्कामा लिएको थियो ।
शर्मा जेभीसँग भएको सम्झौता अनुसार सन् २०२३ डिसेम्बरसम्ममा आयोजनाको काम सम्पन्न गर्नुपर्ने सम्झौता गरिएको झुम्का खानेपानी तथा सरसफाई मुल उपभोक्ता समितिका अध्यक्ष केशीलाल चौधरीले बताए ।
सहरी खानेपानी तथा सरसफाई आयोजना, नगर विकास कोष, रामधुनी नगरपालिका र झुम्का खानेपानी तथा सरसफाई मुल उपभोक्ता समितिबीच भएको सम्झौता अनुसार आयोजनाको काम अगाडि बढाइएको हो ।
रामधुनी नगरपालिकाका ९ ओटा वडामध्ये यो आयोजना अन्तर्गत वडा नम्बर ५, ३, १ र २ नम्बरका विभिन्न बस्तिहरुहरुमा खानेपानी सञ्चालन हुनेछ ।
आयोजनाको काम अन्तर्गत ९ लाख लिटर क्षमताको पानी भण्डारण ट्याङ्की निर्माण, पाइप बिछ्याउने, कार्यालयको भवन निर्माण लगायतका भौतिक पूर्वाधार निर्माणको काम भइरहेको छ । हालसम्म आयोजनाको काम करिब ६० प्रतिशत सम्पन्न भइसकेको छ । मंसिरसम्ममा आयोजनाको सम्पुर्ण काम सकिनुपर्ने गरि ठेक्का सम्झौता गरिएको छ । खानेपानी स्रोतका अनुसार निर्धारित समयमा सम्पुर्ण काम नसकिएमा केहि समय थप गरिनेछ ।
