मेयर शंकरलाल चौधरीको घोषणा–भासी क्याम्पसलाई प्रत्येक बर्ष ५० लाख बजेट दिन्छु

रामधुनी । रामधुनी नगरपालिकाका मेयर शंकरलाल चौधरीले नगरमा रहेको एकमात्र क्याम्पस भादगाउँ सिनुवारी (भासी) बहुमुखी क्याम्पसलाई आफ्नो कार्यकालभरि प्रत्येक बर्ष कम्तिमा ५० लाख रुपैयाँ बजेट दिने घोषणा गरेका छन् ।

आइतबार झुम्का उद्योग वाणिज्य संघको १० औँ साधारण सभालाई सम्बोधन गर्दै मेयर चौधरीले यस्तो बताएका हुन् ।

‘…अहिले क्याम्पस सञ्चालक समितिको अध्यक्ष फौदसिंह थापा दाई हुनुहुन्छ । उहाँले क्याम्पस बनाउँने जिम्मा तेरै हो भन्नुभएको छ । त्यसैले ५० लाख विश्वविद्यालय अनुदान आयोग र ५० लाख नगरपालिकाले गरेर पोहोर १ करोडको भवन बन्यो, यसपालि १ करोडको बन्दैछ ।’ उनले भने, ‘त्यो क्याम्पस आफैँमा पुर्णतः नबन्दासम्म अथवा भनौँ मेरो कार्याकाल रहदासम्म ५० लाख बजेट घट्दैन । पोहोर त ६० लाख दिएँ । क्याम्पसले त्यत्रो अनुदान कहिल्यै पनि प्राप्त गरेको थिएन ।’

फरक प्रशंगमा उनले झुम्का बजारको बिकास र सुरक्षा नगरपालिकाको प्राथमिकतामा रहेको बताएका छन् । झुम्का बजारमा सिसी क्यामेरा मर्मतको काम, एउटै ठाउँमा करिब २ हजार वाटको सडक बत्ति जडान लगायत महत्वपूर्ण काम भइरहेको मेयर चौधरीले बताए । त्यस्तै, सुरक्षालाई मध्यनजर गर्दै रामधुनीमा आएको प्रस्तावित इलाका प्रहरी कार्यालयको स्थायीत्वका लागि आफुले पहल गरिरहेको उनको भनाई छ ।