रामधुनी । रामधुनी नगरपालिका वडा नम्बर १ मा करिब २५ करोड रुपैयाँको लगानीमा अत्याधुनिक राइस मिल सञ्चालनमा आएको छ । ‘जय गणेश एग्रो इन्डस्ट्रीज प्रा.लि.’ नामक उक्त मिल रामधुनी क्षेत्रका स्थापित व्यवसायी भोला रौनियार, अर्का व्यवसायी विजय प्रसाद रौनियारसहित चार जना साझेदारको संयुक्त लगानीमा सञ्चालनमा आएको हो । सोमबार मिलको औपचारिक उद्घाटन गरिएको छ ।
डेढ विघा क्षेत्रफलमा फैलिएको मिलको निर्माणमा जग्गाको मूल्यबाहेक २५ करोडभन्दा बढी खर्च भएको सञ्चालकहरूको भनाइ छ । अत्याधुनिक प्रविधियुक्त मेसिन जडान गरिएको यस मिलबाट गुणस्तरीय चामल उत्पादन गरिने विश्वास लिइएको छ ।
उत्पादन पक्षमा मिलबाट फुल उसिना, हाफ ब्वायल र अरुवा गरी तीन प्रकारका चामल तयार गरिनेछ । सञ्चालक भोला रौनियारका अनुसार बजारको मागअनुसार उत्पादन र गुणस्तरमा उच्च प्राथमिकता दिइनेछ । चामललाई ‘रौनियार ब्रान्ड’, ‘बन्धन ब्राण्ड’, ‘सारंगी ब्राण्ड’ र ‘सम्बन्ध ब्राण्ड’ नाम दिइएर बजारमा पठाइएको छ । ब्रान्डिङमार्फत उपभोक्ताले चामल छनोट गर्न सहज हुने र प्रतिस्पर्धी बजारमा राम्रो उपस्थिति जनाउने अपेक्षा गरिएको छ ।
मिलमार्फत स्थायी रूपमा करिब ६० जनालाई रोजगारी दिन सकिने सञ्चालक रौनियारले बताए । दक्षता अनुसार रोजगारीमा स्थानीयलाई प्राथमिकतामा राखिनेछ । साथै, मिल सञ्चालनमा आएसँगै किसानले अब ठेकदारको भर परेर धान बिक्री गर्नुपर्ने बाध्यताबाट मुक्त हुनेछन् । कृषकले सिधै मिलमै आफ्नो उत्पादन ल्याएर बिक्री गर्न सक्ने हुँदा यसले उनीहरूलाई आर्थिक रूपमा फाइदा पुग्नेछ ।
रौनियारका अनुसार उद्योग सञ्चालनले किसान, उपभोक्ता र व्यवसायीबीचको सम्बन्धलाई अझ बलियो बनाउनेछ । स्थानीय उत्पादनको उचित मूल्य निर्धारण, बजारीकरण र प्रतिस्पर्धी उत्पादन व्यवस्थामार्फत कृषिमा आश्रित समुदायको जीवनस्तर उकास्नसमेत यो मिलले सहयोग सञ्चालहरुले बताएका छन् ।
लगानी, प्रविधि र व्यवस्थापन तीनै पक्षमा उच्च तयारीसहित सञ्चालनमा ल्याइएको जय गणेश एग्रो इन्डस्ट्रीज रामधुनी क्षेत्रको व्यवसायिक उन्नतिको दिशामा एक महत्वपूर्ण कोशेढुंगा बन्ने अपेक्षा गरिएको सञ्चालक विजय प्रसाद रौनियारले बताए ।
Discussion about this post