रामधुनीको बजेट- शिक्षा, स्वास्थ्य र कृषिमा प्राथमिकता 

रामधुनी । रामधुनी नगरपालिकाले आगामी आर्थिक वर्ष २०८२/०८३ का लागि शिक्षा, स्वास्थ्य र कृषि क्षेत्रलाई विशेष प्राथमिकता दिँदै बजेट प्रस्तुत गरेको छ । मंगलबार १८ औँ नगर सभामा शिक्षा, स्वास्थ्य र कृषिलाई प्राथमिकता दिँदै उपप्रमुख तारा थापाले बजेट प्रस्तुत गरिन ।

त्यस्तै, नगरभित्रका विपन्न, दलित र सीमान्तकृत समुदायको स्वास्थ्य सुरक्षालाई सघाउन नगरपालिकाले विपन्न दलित, मुसहर, चमार, डोम लगायतको स्वास्थ्य बीमामा ८० प्रतिशत अनुदान दिने भएको छ । उक्त कार्यक्रमका लागि ४० लाख रुपैयाँ बजेट विनियोजन गरिएको छ ।

नगरपालिकाले स्वास्थ्य सेवा पहुँचलाई विस्तार गर्दै झुम्कास्थित आधारभूत अस्पताललाई स्तरीय बनाउने योजना अघि सारेको छ । जसका लागि १ करोड ८१ लाख ५० हजार रुपैयाँ बजेट छुट्याइएको छ । यस्तै, स्कुल–स्तरसम्म स्वास्थ्य सेवा विस्तार गर्ने उद्देश्यले ‘विद्यालय नर्सिङ कार्यक्रम’ सुरु हुने भएको छ । यसका लागि १८ लाख रुपैयाँ विनियोजन गरिएको छ ।

शिक्षा क्षेत्रमा समेत नगरपालिकाले विभिन्न योजनाहरू ल्याएको छ । भासी क्याम्पसका लागि बस खरिदका लागि ३५ लाख, विद्यालयको चुहिने छाना मर्मतका लागि १२ लाख र प्रविधिमैत्री कक्षा सुधार गर्न २० लाख रुपैयाँ बजेट छुट्याइएको छ । यसले विद्यार्थीहरूको सिकाइ प्रक्रियालाई अझ सहज, सुरक्षित र प्रविधियुक्त बनाउँने उपप्रमुख थापाले बताइन ।

कृषि क्षेत्रमा पनि नगरले युवा कृषकलाई लक्षित गर्दै ‘युवक कृषक प्रोत्साहन कार्यक्रम’ सञ्चालन गर्ने, उत्पादनमुखी कृषक समुहलाई प्रोप्साहन गर्ने, धान पकेट कार्यक्रम सञ्चालन गर्नेजस्ता कार्यका लागि बजेट विनियोजन गरेको छ ।

आइतबार सुरु भएको रामधुनीको १८ औँ नगरसभामा नगर प्रमुख शंकरलाल चौधरीले नीति तथा कार्यक्रम प्रस्तुत गरेका थिए । चौधरीले आगामी आर्थिक बर्षका लागि कुल ८३ करोड १३ लाख ६६ हजार ९ सय ४९ रुपैयाँ बराबरको बजेट प्रस्तुत गरेका थिए । बजेटमा चालु खर्चतर्फ ४७ करोड ७३ लाख ७७ हजार र पुँजीगत खर्चतर्फ करिब ३५ करोड ३९ लाख ८९ हजार रुपैयाँ विनियोजन गरिएको छ ।

सबै घरधुरीको स्वास्थ्य बीमामा वडाले ५० प्रतिशत अनुदान दिने

वडाभित्रका सबै घरधुरीको स्वास्थ्य सुरक्षालाई ध्यान दिँदै रामधुनी वडा नम्बर ५ ले स्वास्थ्य बीमा शुल्कमा ५० प्रतिशत अनुदान दिने भएको छ । ‘नागरिकसँग वडा अध्यक्ष स्वास्थ्य बीमा कार्यक्रम’ नाम दिइएको यो योजनाका लागि वडाले वडास्तरीय बजेटबाट ३० लाख रुपैयाँ बजेट विनियोजन गरेको छ ।

प्रत्येक वडावासीको स्वास्थ्य सुरक्षालाई ध्यान दिएर बीमालाई सर्वसुलभ बनाउने र स्वास्थ्य उपचारमा हुने आकस्मिक खर्चबाट बचाउँने योजनाका साथ यो कार्यक्रम ल्याइएको वडा अध्यक्ष भोला बास्तोलाले बताए । उनका अनुसार वडामा करिब २ हजार १ सय ४८ घरधुरी छन् । प्रत्येक घरधुरीले स्वास्थ्य बीमा गर्दा लाग्ने खर्चको ५० प्रतिशत रकम वडाले तिर्नेछ ।