‘मन्दिरमा ताला लगाएर नित्य पूजा रोकेको आरोप झुटो र निराधार, कुनै सत्यता छैन’

रामधुनी । मन्दिरमा गुठी समितिले ताला लगाएर रामधुनी मन्दिरको नित्य पूजा रोकिएको भन्ने विषय झुटो र निराधार भएको भन्दै रामधुनी बाबा वनस्खण्डी मन्दिर गुठी व्यवस्थापन समितिले आफूहरूमाथि लगाइएको आरोपको खण्डन गरेको छ ।

शनिबार मन्दिरका पुजारी महन्त काशीदास उदासी र उनका अनुयायी दावी गर्ने मोहीनारायण चौधरीले लगाएको आरोपको प्रतिबादमा पत्रकार सम्मेलन गर्दै उक्त आरोप झुटो, निराधार, कपोलकल्पित र भ्रामक भएको समितिका अध्यक्ष डिल्ली कार्कीले बताए ।

अध्यक्ष कार्कीले पत्रकार सम्मेलनमा भने, ‘मन्दिरको ताला लगाएर नित्य पूजा रोक्ने काम भएकै छैन । म र मेरो समितिमाथि लगाइएका आरोप निराधार, भ्रामक र कपोलकल्पित हुन् । त्यसमा कुनै सत्यता छैन ।’ कार्कीले गुठी संस्थानबाट प्राप्त जिम्मेवारीअनुरूप आफूले काम गर्दै आएकाले कानूनविपरीतका कुनै पनि कार्य नगरेको दावी गरे ।

मोहीनारायण भन्ने व्यक्तिले व्यक्तिगत असन्तुष्टिलाई लिएर मन्दिरकै बदनाम गर्ने काम गरेकोसमेत उनको बताए । उनले थपे, ‘मन्दिरमा विवाहित व्यक्तिले पूजाआजा गर्न नपाउँने मान्यता छ । मोहीनारायण भन्ने व्यक्ति विवाहित हुन् । उनले पूजा गरेको भेटेपछि त्यसो नगर्न भनेको हो । त्यहि बिषयमा व्यक्तिगत असन्तुष्टिलाई लिएर मन्दिरकै बदानम गर्ने काम गरे ।’

पत्रकार सम्मेलनमा रामधुनी नगरपालिका प्रमुख शङ्करलाल चौधरी, उपप्रमुख तारा थापा, प्रमुख प्रशासकीय अधिकृत पुरुषोत्तम ढकाल, वडाध्यक्ष कमल कार्कीलगायतको उपस्थिति रहेको थियो ।

पत्रकार सम्मेलनमा बोल्दै नगर प्रमुख चौधरीले रामधुनी मन्दिरमा महन्त काशीदास उदासी र गुठी समिति अध्यक्ष डिल्ली कार्कीबीचको विवादलाई पालिकाले सूक्ष्मरूपमा हेरेको बताए । उनले सोधखोजका क्रममा मोहीनारायण चौधरीको फटाइँ रहेको निष्कर्षमा नगरपालिका पुगेको बताए ।

शनिबार समितिले डाकेको पत्रकार सम्मेलन केही दिनअघि आफूविरुद्धको पत्रकार सम्मेलनमा लगाइएको आरोपको खण्डनकेन्द्रित रहेको थियो । समितिको पत्रकार सम्मेलन मन्दिरको नित्यपूजा रोकेको, पुरातात्विक सम्पदा मासेको र चौपायासमेत बेचविखन गर्नुका साथै मन्दिर हातालाई कङ्क्रिटमा परिणत गर्दै अस्तित्व धुमिल्याउने जस्ता कार्य गरेको आरोप लगाउने मोहीनारायणप्रति लक्षित थियो । सो क्रममा सारा दोष र घटनाक्रमको प्रमुख कारक व्यक्ति मोहीनारायण चौधरीलाई औंल्याइएको छ ।

पत्रकार सम्मेलनमा समितिका कार्कीले आफू नेतृत्वको समिति पूर्णरूपमा मन्दिरको हकहितको सवालमा कटिबद्ध र प्रतिबद्ध रहेको धारणा राखेका थिए । उनले मन्दिरको पूजा नरोकिएको भन्दै निरन्तर नित्य पूजा जारी रहेको बताए ।

अघिल्लो पत्रकार सम्मेलनमा बाबा वनस्खण्डी उदासीन आश्रम रामधुनी गुठी पञ्चायती उदासीन बडा अखडाका अध्यक्ष बताउने मोहीनारायण चौधरीले डिल्ली कार्की उपर नित्य पूजा रोकेकोजस्ता आरोप लगाएका थिए ।