संगीतमा एक सम्भावना राजेश परियार, जसलाई आफ्नै मेहनतले दिलाइरह्यो सफलता

• सुविन विश्वकर्मा

बराहक्षेत्र । ‘तिम्ले त होइन तिम्रा भाकाहरुले मेरो मुटु छोइसकेछन……!’

रियालिटी शो ‘द भ्वाइस अफ किड्स’ को दोस्रो सिजनको स्टेज । ब्लाइण्ड राउन्डको पहिलो प्रफमर । सानो उमेर तर परिपक्व आवाज । वरिपरि दर्शकको घुइँचोले लगाउँदै थियो हुटिङ । अनि गुञ्जियो, राजेश परियारको आवाज ।

जब उनी गीतको पहिलो अन्तराहरू गाउँदै थिए, कोच प्रमोदको कुर्सी घुम्यो । भ्वाइस अफ किड्समा ४ जना कोच (निर्णायकहरू) छन्, मिलन नेवार, सुसान्त केसी, प्रमोद खरेल र प्रबिशा अधिकारी । राजेशले यति मिठो गाए कि कोचहरुका चारै ओटा कुर्सी घुमे । स्वाभाविकै रूपमा राम्रो प्रतिभालाई आफ्नो समुहमा पार्न कोचहरुले अनेकन प्रयास गर्दछन् । राजेशको लागि पनि कोचहरुले अनेकन भने, कोच सुसान्तले ‘स्टान्डिङ अबियसन’ दिए । अनि कोच प्रमोदले त ’सानो बम, ठूलो धमाका’ सम्म भन्न भाए । र अन्त्यमा राजेशले कोच मिलनलाई रोजे ।

अहिले भ्वाइस अफ किड्सको ब्याटल राउन्ड अन्तर्गत १२ एपिसोड सार्वजनिक भइसकेको छ । जहाँ ११ एपिसोडमा कोच मिलनको तर्फबाट प्रतिभाहरुले प्रस्तुति दिएका थिए । ‘सिरुपाते जुँगामा दाहिने हातको ताउ…’ बोलको गीतमा राजेशसँगै अर्पण सिटौला र सिमोन खड्काले गाए । दर्शकको हुटिङ र अरु कोचहरुको तारिफले उक्त प्रस्तुतिलाई अनुमोदन गरिदियो । तर ब्याटल राउन्डको नियमअनुसार तीनमध्ये एकजना मात्र अघिल्लो राउन्डमा प्रवेश पाउँछन् । जसको छनौट अधिकार सम्बन्धित कोचसँग हुने गर्दछ । सोही अनुरुप कोच मिलनले छानिन् राजेश परियारलाई । योसँगै राजेश लाइभ राउन्डमा पुगिसकेका छन् ।

को हुन् राजेश परियार ?
राजेश ओखलढुंगामा जन्मिएका हुन् । उनका बुवा झनक पेशाले नेपाली सेनामा छन् । जसको कारण उनको परिवारको बसाई पनि बद्लिरहन्छ । यद्यपि अहिले राजेशको परिवार सुनसरीको बराहक्षेत्र नगरपालिका २ मा बसोबास गरिरहेको छ । यसअघि राजेशको परिवार ओखलढुंगा, धनकुटा, इटहरी हुँदै अहिले बराहक्षेत्रमा छ । आमा रञ्जुका अनुसार बराहक्षेत्रको बसाइ अब स्थायी हुनेछ । राजेशले आफ्नो पढाइ ओखलढुंगा, धनकुटा हुँदै अहिले बराहक्षेत्रकै एक विद्यालयमा कक्षा ६ मा अध्ययनरत छन् । उमेरले १० वर्षका राजेश पढाइमा पनि अब्बल नै छन् ।

गायनको सवालमा भने उनको कथा अलि रोचक छ । राजेश भन्छन्, ‘मलाई रेडियोतिर गीत बजेको सुन्दानै गाउन मन लाग्थ्यो, सँगै गुनगुनाउने पनि गर्थे, रुचि पहिल्यैदेखि थियो ।’ यता राजेशमाता रञ्जु यसरी सुनाउँछिन्, ‘सानैदेखि गीत गाउन रहर गर्थ्यो, ऊ ७ वर्षको हुँदा हामी धनकुटामा थियौं, त्यहीको स्कुलको सांगीतिक कार्यक्रममा सरले गाउन लगाउनुभएछ, राजेश सेकेन्ड भएछ अनि त्यहीँबाट उत्प्रेरित भएर गाउन थालेको हो ।’

यही क्रममा अलिपछि उनको परिवार बराहक्षेत्र आयो । यहाँका स्थानीय दिपा मंग्रातीसहितको युवा जमातले राजेशलाई भेट्यो । उनको गीतलाई सामाजिक सञ्जालमा राखिदियो र गीतले पनि उस्तै चर्चा बटुल्यो । सोही क्रममा उनै दीपा मग्राती लगायतले भ्वाइसको डिजिटल अडिसनको लागि पहल गरे । राजेश डिजिटल अडिसनबाट छनौट भएपछि थप यात्रा प्रारम्भ भएको दीपा मग्राती बताउँछिन् ।

आधुनिक र पुरानो गीत गाउन मन लाग्ने गरेको राजेशले बताए । तर उनले गाएका सबैखाले गीतहरूमा अब्बल दर्जाको गायकी देख्न पाइन्छ । परिवार स्रोतकाअनुसार राजेशले अहिलेसम्म कुनैपनि औपचारिक संगीत कक्षा लिएका छैनन् । तर संगीत सिक्नुपर्ने आवश्यकता भने महसुस भएको राजेशको भनाइ छ ।

भ्वाइसको उपाधि चुम्ने रहर
क्षमता, प्रतिभा, लगनशीलता र अहिलेसम्मको यात्रालाई नियाल्ने होभने राजेश परियार भ्वाइस अफ किड्स दोस्रो सिजनको विजेता बन्नसक्ने संगीतप्रेमीहरुको बुझाइ छ । राजेश पनि यही लक्ष्यलाई पछ्याउँदै यात्रा गरिरहेका छन् । उनी भन्छन्, ‘म आफैलाई चाहिँ भ्वाइसको विजेता बन्नसक्छु भन्ने लाग्छ, तर त्यसको लागि सबैको साथ र सहयोग पनि चाहिन्छ ।’

भोटिङ राउन्डमा प्रवेश भएसँगै राजेश परिवार यतिबेला प्रचारदौडाहमा छ । विभिन्न स्टेज कार्यक्रम र अन्तर्वार्ताहरुमा व्यस्त रहेका उनले सोही अनुरुपको चर्चा पनि बटुलिरहेका छन् । त्यसै पनि संगीतमा राम्रो सम्भावना बोकेका प्रतिभा हुन् राजेश । उनको लागि भ्वाइसको विजेता मात्र नभएर संगीत क्षेत्रमै दीर्घकालीन साधनाको बाटोलाई समात्न सके उपयुक्त लय हुने देखिन्छ ।