रामधुनी । सुनसरी सदरमुकाम इनरुवामा रहेको जिल्ला अस्पताल सुनसरीले स्वास्थ्य बिमा वापतको करिब ६ करोड रकम शोधभर्ना नपाएपछि अस्पतालमा उपचार रोकिने जोखिम भएको छ । विमा बोर्डले २०८० चैत्र महिनादेखिको बक्यौता रकम भुक्तानी नगरेपछि आर्थिक अभावका कारण अस्पताल समस्यामा परेको मेडिकल सुपरिटेन्डेन्ट डा. अभिताव ठाकुरले जानकारी दिए ।
अस्पतालमा आर्थिक अभावकै कारण ओपिडी सेवा, औषधी, ल्याब, एक्सरे लगायत सेवा प्रभावित हुन थालेका छन् । ‘करिब ६ करोड रकम अस्पतालले बिमा वापतको भुक्तानी पाएको छैन । अघिल्लो आर्थिक बर्षको लगभग ४ महिनाको र यो आर्थिक बर्षको अहिलेसम्म गरेर झण्डै १ बर्ष भनौँ न, त्यति समयको भुक्तानी हामीले पाएको छैन ।’ डा. ठाकुरले प्रश्न गर्दै भने, ‘औषधी, ल्याब केमिकल, एक्सरेलगायत स्वास्थ्योपचारमा आवश्यक पर्ने जति पनि सामग्री आपूर्तीकर्ता हुनुहुन्छ, उहाँहरुको भुक्तानी समयमा गर्नैपर्यो । करार, ज्यालादारी कर्मचारीको भुक्तानी गर्नैपर्यो । बर्ष दिनसम्म बिमाको पैसा नआएपछि कसरी धान्न सक्नू !’
विमा बोर्डले रकम भुक्तानी गर्ने आशामा अस्पतालले आफ्नो आन्तरिक आम्दामीको अधिकांश हिस्सा विमावापतको सेवामा खर्च गरेको छ । तर भुक्तानी नपाउँदा अस्पतालले कर्मचारीलाई तलबसमेत दिन नसक्नेगरि चरम आर्थिक संकटबाट गुज्रिनु पर्ने स्थिति सिर्जना भएको अस्पताल प्रशासनले जनाएको छ ।
उनका अनुसार आर्थिक अभावकै कारण अस्पतालले ल्याब टेस्टहरु धान्न मुस्किल पर्न थालेको छ । मेसु डा. ठाकुरले भने, ‘थाइराइड, भिटामिन डी, वि १२ लगायतका टेष्टहरु धान्न समस्या भइरहेको छ । अस्पतालले तिर्न बाँकी विभिन्न सप्लायर्सले भुक्तानीका लागि दवाव दिइरहनु भएको छ । बिमा बोर्डले चाँडै बक्यौता पठाएन भने स्वास्थ्योपचारमा आवश्यक पर्ने सामग्रीको आपूर्तीमा समस्या हुन्छ ।’
स्वास्थ्य विमा कार्यक्रम अन्तर्गत अस्पतालले ओपीडी, इमर्जेन्जी, ल्याब, अन्तरंग, शल्यक्रिया, एक्सरेलगायत उपचार सेवा र सरकारले तोकेअनुसारको औषधी उपलब्ध गराउँदै आएको छ । तर आर्थिक संकटका कारण कतिपय सेवाहरु बन्द हुनुका साथै विरामीहरु अधिकांश औषधी निजी क्लिनिकमा किन्न बाध्य हुन थालेका छन् ।
५० बेडको इनरुवा अस्पतालमा जम्मा १२० जना कर्मचारी कार्यरत छन् । जसमध्ये करिब ५७ जना कर्मचारी करार र ज्यालादारीमा कार्यरत छन् । तलब–भत्तामा मात्रै अस्पतालको मासिक झण्डै २० लाख खर्च हुने मेसु डा. ठाकुरले बताए ।
