स्वायत्त र संरक्षित प्रदेश बनाउन कांग्रेस–एमालेले नचाहेको प्रचण्डको दावी

सुनसरी । पूर्व प्रधानमन्त्रीसमेत रहेका नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले कांग्रेस र एमालेले संविधान अनुसार स्वायत्त र संरक्षित प्रदेश बनाउन नचाहेको दावी गरेका छन् ।

‘जनतासँग माओवादी तराई–मधेश जागरण अभियान’ अन्तर्गत मंगलबार मोरङको कानेपोखरी गाउँपालिकामा पार्टीले आयोजना गरेको आमसभालाई सम्बोधन गर्दै अध्यक्ष प्रचण्डले यस्तो दावी गरेका हुन् । उनले संविधानमा स्वायत्त, विशेष तथा संरक्षित प्रदेश हुने कुरा उल्लेख भएको बताए ।

‘संविधानमा स्वायत्त प्रदेश, विशेष प्रदेश, संरक्षित प्रदेश हुनेछ भनेर लेखिएको छ । तर, कांग्रेस र एमालेजस्ता पार्टीहरु त्यो संविधानको व्यवस्था लागू गर्न चाहँदैनन् ।’ प्रचण्डले भने, ‘त्यसो गरियो भने यहाँ धिमालहरको एउटा विशेष संरक्षित प्रदेश हुनसक्छ । मेचे कोचेको पनि प्रदेश हुनसक्छ, तीनिहरूको बाहुल भएको इलाकामा । शेर्पाहरूको प्रदेश हुनसक्छ । कोचको हुनसक्छ । त्यसरकाण उनीहरु मान्दैनन् । हामी चाहन्छौँ संविधानको व्यवस्था अनुसार ऐन बनाएर ती प्रदेशहरु पनि बन्नुपर्यो ।’

फरक प्रशंगमा अध्यक्ष प्रचण्डले पाथीभरा केबुलकार निर्माण विवादमा सरकारले बल प्रयोग गरे माओवादी आन्दोलनकारीको पक्षमा उभिने बताएका छन् । उनले भने, ‘..बल प्रयोग गरेर आन्दोलनकारीको टाउको फुटाएर, विचरा प्रहरी नचाहँदा नचाहँदै पनि सरकारले भनेको मान्नुपर्ने, थुप्रै प्रहरी पनि घाइते हुने जुन परिस्थिति सरकारले बनाएको छ, फेरि पनि त्यसलाई रोकेर वार्ता र संवादबाट त्यसलाई रोकियोस् । यदि रोकिएन भने माओवादी आन्दोलनकारीको पक्षमा उभिनेछ र देशव्यापी आन्दोलनतिर जानेछ ।’ उनले पाथीभराको बिषय सांस्कृतिक र भावनात्मक भएकाले बल प्रयोग गर्ने दुस्साहस नगर्न सरकारलाई आग्रह गरे ।