यी हुन् झुम्का बजार व्यवस्थापनबारे अध्यन गर्न बनेको ११ सदस्यीय समितिका सदस्यहरु

रामधुनी । रामधुनी नगरपालिका क्षेत्रको प्रमुख आर्थिक केन्द्रका रूपमा रहेको झुम्का बजार व्यवस्थापनबारे अध्यन गर्न रामधुनी–५ का वडाअध्यक्ष लेखनाथ बास्तोलाको संयोजकत्वमा ११ सदस्यीय समिति बनेको छ ।

नगर प्रमुख शंकरलाल चौधरीको अध्यक्षतामा सोमबार झुम्कामा आयोजित ‘बजार व्यवस्थापनसम्बन्धी अन्तरक्रिया कार्यक्रम’पछि नगरपालिकाले समिति निर्माण गरेको हो ।

समितिमा जनप्रतिनिधि, व्यापारी, युवा प्रतिनिधि, यातायात सेवा प्रदायकलगायत समावेश छन् । सदस्यहरूमा रामधुनी–१ का वडा सदस्य रामभरोसी रौनियार, झुम्का उद्योग वाणिज्य संघका अध्यक्ष नविन कुमार चौधरी, जेनजी युवाहरूको प्रतिनिधि गोविन्द आचार्य, लायन्स क्वलका तर्फबाट व्यवसायी कमल रौनियार, झुम्का जेसीज अध्यक्ष दिपेश वराइली, बस टिकट काउन्टर प्रतिनिधि राजकुमार रायमाझी, स्थानीय प्रतिनिधि सम्झना घिमिरे, ट्याम्पो तथा सिटीसफारी प्रतिनिधि रमेश विश्वकर्मा र दिपक अधिकारी रहेका छन् । समितिको सदस्य सचिवको जिम्मेवारी नगरपालिका राजश्व शाखा प्रमुख एवं सूचना अधिकारी सुमन पौडेलले सम्हाल्नेछन् ।

समितिले सात दिनभित्र बजार व्यवस्थापन सम्बन्धी सुझावसहितको प्रतिवेदन नगरपालिकामा पेश गर्नेछ । ‘समितिको बैठकसमेत बसिसकेको छ । सात दिनभित्र सुझावसहितको प्रतिबेदन पेश गर्नेगरी हामीले काम अगाडि बढाएका छौँ’ सदस्य सचिव पौडलले भने ।

नगरपालिकाले उक्त प्रतिवेदनको आधारमा सडक, पार्किङ, फोहोर व्यवस्थापन र अव्यवस्थित पसल लगायतको मापदण्ड निर्माण गरी  बजारलाई व्यवस्थित गर्न आवश्यक कदम अघि बढाउने जनाएको छ ।