सुनसरी । प्रतिनिधि सभाका सभामुख डीपी अर्यालले संसद्लाई प्रभावकारी, उत्तरदायी र जनमुखी बनाउन सबै दल र सदस्यहरूको साझा जिम्मेवारी रहेको बताएका छन् ।
आज प्रतिनिधि सभाको बैठकलाई सम्बोधन गर्दै उनले संसद्लाई केवल बहस गर्ने थलो नभई कार्यसम्पादनको केन्द्रका रूपमा स्थापित गर्नुपर्नेमा जोड दिए । उनले नेपालको संविधान, लोकतन्त्र र संसदीय पद्धतिको मूल्यमान्यतालाई आत्मसात् गर्दै समृद्ध राष्ट्र निर्माणका लागि सशक्त संसदीय अभ्यास आवश्यक रहेको उल्लेख गरे ।
‘जनताको अभिमत बोकेर आएका हामी सबै सदस्यहरू यही सदनमा बसेर नागरिकका समस्या समाधानको स्पष्ट मार्ग पहिल्याउनुपर्छ,’ उनले भने, ‘विकास र समृद्धिको यात्रामा नागरिकको आकांक्षा नै हाम्रो मार्गदर्शक हो ।’
सभामुख अर्यालले बहुदलीय व्यवस्थामा जनताको मत नै सर्वोपरि हुने भन्दै सबै सदस्यबीचको समन्वयबाट मात्र संसद्को गरिमा र प्रभावकारिता बढ्ने स्पष्ट पारे ।
उनले संसद् सञ्चालनमा अनुशासन र मर्यादालाई प्राथमिकतामा राखिने बताए। ’संसद् सबैभन्दा अनुशासित र मर्यादित ढंगले चल्नुपर्छ,’ उनले भने, ‘कानुन, कार्य सञ्चालन नियमावली र प्रचलित अभ्यासअनुसार बैठक अघि बढ्नेछ।’ साथै, नयाँ प्रतिनिधि सभा गठनसँगै छिट्टै नियमावली मस्यौदा समिति गठन गरिने जानकारी दिए ।
सदनका हरेक निर्णय र गतिविधि जनताले नजिकबाट नियालिरहेको स्मरण गराउँदै उनले पारदर्शिता र जवाफदेहिता अपरिहार्य रहेको बताए । सभामुखको भूमिका तटस्थ र निष्पक्ष रहने प्रतिबद्धता जनाउँदै उनले भने, ‘संसद्मा सबै सदस्यहरूको भूमिका बराबर हुन्छ। दलगत आधारमा कसैमाथि भेदभाव हुने छैन ।’
Discussion about this post