एमाले सुनसरीको आह्वान : सार्वजनिक पद धारण गरेका हाम्रै नेता कार्यकर्ताको सम्पत्ति छानबिन गर, दोषी ठहरिए कारवाही होस्

रामधुनी : नेकपा एमाले सुनसरीले ०४६ सालपछि सार्वजनिक पद धारण गरेका पार्टीका नेता तथा कार्यकर्ताको सम्पत्ति छानबिन गर्न सम्बन्धित निकायलाई आग्रह गरेको छ ।

गत कात्तिक २३ गते बसेको जिल्ला कमिटीको विस्तारित बैठकले यस्तो निर्णय गरेको हो । निर्णयमा उल्लेख छ, ‘०४६ सालपछि जनप्रतिनिधि, राजनीतिक नियुक्ति र सार्वजनिक पदमा रहेका सुनसरीका एमाले नेता कार्यकर्ताको सम्पत्ति छानबिन गरी दोषी ठहरिएमा कानुनी कारबाही गर्न सम्बन्धित निकायलाई आह्वान गर्दछौँ ।’

पार्टीभित्र स्वच्छ राजनीतिक अभ्यास र पारदर्शी नेतृत्व विकास गर्ने उद्देश्यले यस्तो निर्णय गरिएको एमाले सुनसरीका सचिव राम कोइरालाले बताए । उनले भने, ‘राजनीतिमा जनविश्वास पुनःस्थापित गर्नका लागि नेताहरूको आचरण र आर्थिक स्रोत पारदर्शी हुनैपर्छ । त्यसैले, हामी आफ्नै पार्टी पंक्तिबाट छानबिनको संस्कार सुरुवात गर्न चाहन्छौं ।’

उनका अनुसार यस निर्णयले पार्टीभित्र इमानदार नेतृत्वलाई सशक्त बनाउने र जनतामा सकारात्मक सन्देश जाने विश्वास लिइएको छ ।

बैठकमा पार्टीका स्थायी कमिटी सदस्य तथा कोशी प्रदेश इन्चार्ज शेरधन राई, पार्टीका केन्द्रीय सदस्यहरु, केन्द्रीय निकायका सदस्यहरु, कोशी प्रदेश कमिटी सदस्यहरु तथा जिल्ला कमिटी सदस्यहरू लगायतको उपस्थिति रहेको थियो ।