रामधुनी । रामधुनी नगरपालिकाले नगर क्षेत्रभित्र सञ्चालित सबै सामुदायिक तथा धार्मिक विद्यालयहरूलाई बेरुजु फछ्र्यौट गरी प्रगति प्रतिवेदन पेश गर्न कडा निर्देशन दिएको छ ।
नगर कार्यपालिकाको कार्यालयले एक पत्र जारी गर्दै हालसम्मको लेखापरीक्षणका क्रममा औँल्याइएको ‘असुल उपर गर्नु पर्ने बेरुजु’ र ‘नियमित गर्नु पर्ने बेरुजु’ का सन्दर्भमा आवश्यक कारबाही प्रक्रिया अघि बढाउन भनेको हो ।
कार्यालयका प्रमुख प्रशासकीय अधिकृत तेजनारायण यादवद्वारा हस्ताक्षरित पत्र अनुसार, सबै सामुदायिक तथा धार्मिक विद्यालयहरूले सूचना जारी भएको मितिले ७ (सात) दिनभित्र आवश्यक कागजात सहित नगरपालिका कार्यालयमा प्रगति प्रतिवेदन पेश गरिसक्नुपर्नेछ ।
तोकिएको समयसीमाभित्र प्रगति प्रतिवेदन पेश नगरेमा वा कारबाही प्रक्रिया अघि नबढाएमा कानूनबमोजिम भई जाने व्यहोरासमेत नगरपालिकाले स्पष्ट पारेको छ ।
महालेखा परीक्षकको कार्यालयले सार्वजनिक गरेको आर्थिक वर्ष २०८१/०८२ को अन्तिम लेखापरीक्षण प्रतिवेदनअनुसार नगरपालिकामा बेरुजुको रकम ४० करोड रुपैयाँ नाघिसेको छ ।
बेरुजु रकम अत्यधिक भएको भन्दै पछिल्लो समय जनस्तरबाट नगरपालिकाको चर्को आलोचना हुँदै आएको छ ।
Discussion about this post