विद्यालयदेखि शिविरसम्म : रामधुनीका एक हजार विद्यार्थी र तीन सय नागरिक लाभान्वित

रामधुनी । रामधुनी नगरपालिकामा बुधबार सम्पन्न स्वास्थ्य शिविरबाट तीन सयभन्दा बढी स्थानीयले सेवा लिएका छन् । रामधुनी नगरपालिका र राष्ट्रिय स्वास्थ्य कोषको सहकार्यमा वडा नम्बर ७ स्थित पञ्चायन माध्यमिक विद्यालयमा आयोजना गरिएको उक्त शिविरमा विशेषज्ञ चिकित्सकहरूको टोलीले सेवा दिएको हो ।

शिविरमा जेनेरल फिजिसियन, स्त्री तथा प्रसूति रोग विशेषज्ञ, हाडजोर्नी तथा नसा रोग विशेषज्ञ, बालरोग विशेषज्ञ, नाक कान घाँटी विशेषज्ञ र जेनेरल सर्जन सहितका चिकित्सकले सेवा दिएका थिए । साथै, भिडियो एक्सरे, इसीजी, सुगर र प्रेसर जाँच समेतको सुविधा उपलब्ध गराइएको थियो ।

राष्ट्रिय स्वास्थ्य कोषका सदस्य–सचिव मेघराज न्यौपानेले स्वास्थ्य सेवा पहुँचबाट टाढा रहेका समुदायलाई लक्षित गर्दै शिविर सञ्चालन गरिएको बताए । ‘यो कार्यक्रम मार्फत विशेषज्ञ डाक्टरहरूको सेवा गाउँसम्म पुगेको छ । सेवा लिन आउने नागरिकहरू उत्साहित हुनुहुन्छ,’ उनले भने । ‘बालबालिकादेखि वृद्धसम्मले सेवा लिनुभएको छ । समुदायले प्रत्यक्ष फाइदा लिएको देख्दा कार्यक्रम सफल भएको महसुस भएको छ ।’

शिविरसँगै यसअघि जेठ २५ गतेदेखि असार ४ गतेसम्म रामधुनी नगरभित्रका १० वटा सामुदायिक माध्यमिक विद्यालयहरूमा स्वास्थ्य शिक्षा कार्यक्रम सञ्चालन गरिएको थियो । डाक्टर र नर्सहरूको टोलीले विद्यालय–विद्यालय पुगेर व्यक्तिगत सरसफाई, पोषणयुक्त खानपान, रोग निवारण र प्राथमिक उपचारबारे विद्यार्थीहरूलाई जानकारी दिएको न्यौपानेले बताए । ‘कम्तीमा एक हजार विद्यार्थीलाई स्वास्थ्य शिक्षा दिन सफल भएका छौँ । नगर क्षेत्रका सबै सामुदायिक माध्यमिक विद्यालयमा पुगेका छौँ,’ उनले भने ।

नगरपालिकाकी उपप्रमुख तारा थापाले स्वास्थ्य क्षेत्रलाई उच्च प्राथमिकतामा राखेको बताइन् । ‘विद्यालय तहका बालबालिकालाई स्वास्थ्य शिक्षा दिनु आजको आवश्यकता हो । त्यसैगरी, समाजमा सस्तो, सरल र सुलभ स्वास्थ्य सेवा पुर्याउँनु हाम्रो कर्तब्य हो,’ उनले भनिन् । ‘यसले सबै वर्ग र समुदायलाई प्रत्यक्ष लाभ दिएको छ । त्यसैले हामीले राष्ट्रिय स्वास्थ्य कोषसँग सहकार्य गरेर यो कार्यक्रम सञ्चालन गरेका हौं ।’ आगामी दिनमा यस्ता कार्यक्रमलाई थप प्रभावकारी बनाउँदै निरन्तरता दिइने थापाले बताइन ।