रामधुनी । सुनसरीको रामधुनी नगरपालिकाविरुद्ध विभिन्न ६ ओटा राजनीतिक दल र झुम्का उद्योग वाणिज्य संघ एक ठाउँमा उभिएका छन् ।
संघ–संस्था र राजनीतिक दलहरुलाई उपेक्षा गरेको तथा नेकपा (माओवादी केन्द्र) रामधुनी नगर कमिटीले सूचनाको हक अन्तर्गत माग गरेको सूचना नगरपालिकाले नदिएको भन्दै दलहरु एक ठाउँमा उभिएका हुन् ।
नगरपालिकाविरुद्ध नेपाली कांग्रेस रामधुनी, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा एकीकृत समाजवादी, नागरिक उन्मुक्ति र झुम्का उद्योग वाणिज्य संघले सोमबार संयुक्त विज्ञप्ति जारी गरेका छन् ।
उद्योग वाणिज्य संघ, राष्ट्रिय स्वतन्त्र पार्टी र नेपाली काँग्रेसले विभिन्न रचनात्मक तथा सिर्जनात्मक सुझावहरु दिदैँ आए पनि उपेक्षा गरेको तथा माओवादीले मागेको सूचना नदिएर नगरपालिकाले नेपालको संविधान २०७२ तथा सूचनाको हक सम्बन्धि ऐन २०६४ को विरुद्धमा नागरिकको संविधानप्रदत्त अधिकार कुंठित गरेकोमा दलहरुले आपत्ति जनाएका छन् ।
सार्वजनिक महत्वको सूचनासमेत वदनियतपूर्ण ढंगले लुकाउने प्रवृत्तिले नगरपालिका भ्रष्टचार र अनियमिततामा चुर्लुम्म डुवेको भान भएको दलहरुको भनाई छ । नगरपालिका तत्काल सच्चिएर अगाडि नबढे निर्मम ढंगले अगाडि बढ्न राजनीतिक दलहरु तयार रहेकोसमेत विज्ञप्तिमा उल्लेख गरिएको छ ।
राम्रो काम पनि नगर्ने, कसैको सुझाव पनि नलिने, सूचना माग गर्दासमेत नदिने लगायत नगरपालिकाका गतिबिधि गलत भएकाले राजनीतिक दलहरु एक हुने परिस्थिति सिर्जना भएको कांग्रेस रामधुनीका सभापति सुदीप अधिकारीले बताए । सूचना नदिने कार्य संविधान र लोकतान्त्रिक मुल्यमान्यताविरुद्ध भएकाले कांग्रेस चुप लागेर नबस्ने उनको भनाई छ । ‘सूचना नदिनु सामान्य बिषय होइन । चाहे माओवादी पार्टीले मागोस् वा आम सर्वसाधारण जनताले मागोस्, सूचना प्रत्येक नागरिकको अधिकारको कुरा हो । उनले भने, ‘नगरले यो पटक माओवादीलाई सूचना दिएन भने हामी सबै राजनीतिक दल चुप लागेर बस्दैनौँ । यो कुरा नगरपालिकालाई हेक्का रहोस् ।’
माओवादीले विभिन्न सार्वजनिक सरोकारका बिषयमा सूचनाको हक अन्तर्गत गत चैत्र २७ गते विभिन्न प्रश्नहरुको १५ दिनभित्र लिखित सूचना दिन माग गर्दै नगरपालिकामा निवेदन दिएको थियो । तोकिएको समयमा सूचना नपाएपछि पुनः आइतबार (१६ गते) दोस्रोपटक सात दिनको समय दिएर सुचना माग गरेको छ ।
Discussion about this post