इनरुवा । सुनसरी सदरमुकामसमेत रहेको इनरुवा नगरपालिकाका दुई २ ओटा सामुदायीक विद्यालयमा विद्युतबाट चल्ने विभिन्न उपकरण भए पनि विद्युत लाइन जडान नहुँदा कुनैपनि उपकरणहरु लामो समयदेखि प्रयोगमा आउन नसकेको पाइएको छ ।
विद्युत जडान नगरी नगरपालिकाले ति विद्यालयका शिक्षकहरुको लागि ई–हाजिरी मेसिनसमेत जडान गरेको छ, तर विद्युत जडान नभएर शिक्षकहरु कागजकै रजिष्टरमा हाजिर गर्दै आएका छन ।
इनरुवा २ मा सञ्चालित बुढा सुब्बा आधारभुत विद्यालयमा आवश्यक इन्टरनेट जडान गरिएको छ । शिक्षकहरुका लागि ई–हाजिरी मेसिन जडान गरिएको छ । कक्षा कोठाहरुमा विद्यार्थीलाई पठनपाठनका लागि गर्मीमा सहज होस भनेर आठ वटा पंखाहरु विभिन्न दाताहरुबाट जडान भएका छन । त्यस्तै विद्यालयको काम गर्नलाई कप्यूटर र फोटोकपी मेसिनसमेत रहेको छ । त्यस्तै पानी तान्ने मोटर पनि विद्यालयमा जडान गरिएको छ । तर नगरपालिकाले विद्युत जडानमा बेवास्ता गर्दा लामो समयदेखि ति विद्युतीय उपकरणहरु थन्किएर बसेका छन ।
विद्यालयका प्रधानाध्यापक गणेश भट्टराई आधारभुत विद्यालय सञ्चालनका लागि आवश्यक सबै विद्युतीय उपकरणहरु विद्यालयमा रहेपनि नगरपालिकाले विद्युत जडानमा चासो नदिदा भएका उपकरणहरु चलाउन नसकेर विग्रिने अवस्थामा पुगेका छन । उनले भने, ‘विद्युत नभएको देख्दा देख्दै ई–हाजिर ल्याएर राखिदिए, त्यसको लागि इन्टरनेटसमेत जडान गरे । दाताहरुले पंखादेखिका उपकरण विद्यार्थीको सहजताका लागि दिए । तर ति उपकरणहरु चलाउन नपाउँदा न शिक्षक न विद्यार्थी कसैले फाइदा लिन सकेका छैनन बरु उल्टै ति उपकरणहरु चलाउन नपाउँदा बिग्रिने स्थितिमा पुगिसकेका छन ।’
त्यसैगरी इनरुवा ९ मा रहेको बीपी मेमोरियल आधारभुत विद्यालयमा कक्षा कोठाका लागि पंखा, कम्प्यूटर, पानी तान्ने मोटर, ई–हाजिरी र इन्टरनेट लगायतका सबै सुविधाहरु जडान गरिएको छ । तर नगरपालिकाले विद्युत लाइन जडानमा बेवास्ता गर्दा ति विद्युतीय उपकरणहरुको फाइदा न विद्यार्थी र शिक्षकहरुले नै लिन सकेका छन ।
सो विद्यालयका एक शिक्षकले विद्युतबाट चल्ने आवश्यक सबै उपकरणहरु विद्यालयमा रहेपनि विद्युत लाइन जडान नहुँदा कुनैपनि उपकरणहरु लामो समयदेखि प्रयोगमा आउन नसकेको गुनासो गरे ।
