रामधुनीमा मध्यराती खसी चोरमाथि घरधनीले खुकुरी प्रहार गर्दा राकेशको मृत्यु

रामधुनी । सुनसरीको रामधुनी नगरपालिका–२ शिवनगरमा खसी चोरी गर्न आएका व्यक्तिमाथि घरधनीले खुकुरी प्रहार गर्दा एक जनाको मृत्यु भएको छ ।

इलाका प्रहरी कार्यालय पकलीका अनुसार मृतक रामधुनी–४ लालपुरका ४२ वर्षीय राकेश चौधरी हुन् । सोमबार बिहान करिब २ः३० बजे सन्तोष चौधरीको घरबाट खसी र पाठो चोरी गर्न खोजिएको थियो । चोरीको प्रयासमा संलग्न राकेशलाई घरधनी सन्तोषले लखेटेर खुकुरी प्रहार गरेका थिए ।

प्रहरीका अनुसार खुकुरी प्रहारबाट राकेशको दाहिने हातको नाडीमा गहिरो चोट लागेको थियो । उनलाई तत्काल झुम्कास्थित साई अस्पतालमा ल्याइएको र त्यहाँबाट विराटनगरको नोबेल अस्पतालमा रिफर गरिएको थियो । उपचारकै क्रममा बिहान ५ बजे उनको मृत्यु भएको इलाका प्रहरी कार्यालय पकलीका प्रमुख लेखनाथ दाहालले जानकारी दिए ।

प्रहरीले खुकुरी प्रहार गर्ने सन्तोषलाई नियन्त्रणमा लिई जिल्ला अदालत सुनसरीबाट ७ दिनको म्याद थप गराएर अनुसन्धान अघि बढाएको जनाएको छ । घटनामा प्रयोग गरिएको खुकुरी पनि प्रहरीले बरामद गरेको छ । रामधुनी–२ का वडा अध्यक्ष रामनारायण चौधरीले घटनालाई दुर्भाग्यपूर्ण बताउँदै अनुसन्धान निष्पक्ष हुनुपर्नेमा जोड दिएका छन् ।