मानसिक रोगले साउदीमा सम्पर्कविहीन रामधुनीका अमन, सरकारी सहयोगको पर्खाइमा परिवार

रामधुनी । वैदेशिक रोजगारीका लागि साउदी अरब पुगेका सुनसरीको रामधुनी नगरपालिका–१ शैनिमैनीका २९ वर्षीय अमन चौधरी मानसिक समस्याका कारण सम्पर्कविहीन भएपछि उनका परिवारजन चिन्तित बनेका छन् । परिवारले उनको खोजी तथा उद्धारका लागि सम्बन्धित निकायसँग पहल गरिदिन आग्रह गरेको छ ।

अमन २०८० साल कार्तिकको पहिलो साता रोजगारीका लागि साउदी अरब गएका थिए । सुरुमा केहि समय एक सप्लाई कम्पनीमा काम गरेका उनले पछि कम्पनी परिवर्तन गरी अर्को कम्पनीमा काम गर्दै आएका थिए ।

अमनकी दिदी अञ्जना चौधरीकाअनुसार पछिल्लो समय उनी मानसिक समस्याबाट पीडित थिए । करिब नौ दिनसम्म सम्पर्कविहीन रहेका उनी जुन १५ मा परिवारसँग सम्पर्कमा आएका थिए । त्यसपछि जुन १८ सम्म श्रीमती लक्ष्मी चौधरीसँग कुराकानी भएको परिवारले जनाएको छ ।

परिवारले उनलाई नेपाल फर्काउन टिकटसमेत व्यवस्था गरेको थियो । तर विमानस्थल पुगेपछि उनले ‘असामान्य’ व्यवहार देखाएको र विमानमा चढ्न नमानेपछि सम्बन्धित निकायले उनलाई फिर्ता पठाएको जानकारी परिवारले पाएको छ । ‘उहाँलाई नेपाल फर्काउन टिकट काटेका थियौं,’ श्रीमती लक्ष्मीले भनिन्, ‘तर विमानस्थलमै असामान्य व्यवहार देखिएछ । प्लेन चढ्न नमानेर हल्ला गरेपछि फर्काइदिएको भन्ने जानकारी पायौं ।’

त्यसयता अमनसँग सम्पर्क हुन सकेको छैन । परिवारकाअनुसार साउदी अरबमै रहेका श्रीमती लक्ष्मीका ज्वाईँमार्फत नेपाली दूतावासमा सम्पर्क भइरहेको भए पनि कुनै प्रगति हुन सकेको छैन ।

अमनका ९ वर्षीय छोरा छन् । उनकी आमाको मृत्यु भइसकेको छ भने परिवारमा वृद्ध बाबु, श्रीमती र छोरा रहेका छन् । परिवारले उनको अवस्थाबारे कुनै जानकारी नपाउँदा थप चिन्ता बढेको जनाएको छ ।

श्रीमती लक्ष्मीका अनुसार परिवारले विभिन्न सरकारी निकायसँग खोजी र उद्धारका लागि सहयोग माग्दै आएको भए पनि हालसम्म ठोस उपलब्धि हासिल हुन सकेको छैन । उनले भनिन्, ‘हामीले धेरै ठाउँमा भनेका छौँ । नगरपालिकामा पनि निवेदन दिएको छ । काठमान्डौँमा पुगेर पनि निवेदन दिएका छौँ । सम्बन्धित निकायले खोजी गरेर उहाँलाई सकुशल नेपाल फर्काइदिनुहोस् भन्ने हाम्रो अनुरोध छ ।’

परिवारले मानसिक समस्या देखिएर सम्पर्कविहीन भएका अमनलाई उद्धार प्रक्रिया अघि बढाएर यथासिघ्र नेपाल ल्याउँने पहल गरिदिन सरकारसँग आग्रह गरेको छ ।